Pa fraccion MAS ta inaceptabel cu minister Glenbert Croes no kier presenta na Parlamento di Aruba y responsabilisa su mes. MAS a manda un peticion n’e mandatario despues cu el a haya sentencia di hues riba e caso cu e tin cu director di DIMAS, Kathy Paskel.
drs. Marisol Lopez-Tromp, lider di fraccion MAS, a sigui bisa cu hues a duna un vonnis di e parti dje procedura cu a laga e minister na werki. Ta mustra cu e stapnan cu e mandatario a core tuma tabata uno robes. Como minister di tanto aña den e trabou aki, pa MAS ta straño cu a efectua e stapnan pa hala hende un banda ta uno y pa di dos, pa hacie di forma incorecto contra ley, contra constitucion, contra Landsverordening Instelling Ministeries (LIM) manera Croes a haci.
Consecuentemente fraccion MAS a pidie pa presenta na parlamento p’e splica riba e consecuencianan cu e vonnis tin. Lopez-Tromp a duna algun ehempel manera consecuencia pa DIMAS, consecuencia p’e proceduranan diario pa DIMAS. Kico a cambia despues cu el a ricibi e sentencia aki. Fraccion MAS kier sa, pasobra pueblo ta acudi na DIMAS tur dia pa nan peticionnan, nan proceduranan. Segun lider di fraccion, nan kier claridad riba e consecuencianan di e echo cu hues a schors su ministeriële beschikking.
P’esey e fraccion a manda carta pa Croes, kende no a duna oido. A manda e prome carta na comienso di juni y e no a contesta. Despues a manda un rapel dia 21 di juni pidiendo Croes pa presenta p’un reunion publico na Parlamento. Minister mester responsabilisa ora cu pidie esey. Presidente di Parlamento mester yama e reunion den tanto dia y den e caso aki ta un reunion publico. Den e rapel manda p’e, MAS a splica cu e mester presenta parlamento y no por nenga.
Pa mas lesa TREMPAN.COM.
