Mario Arends, Commercial Manager na Aruba Ports Authority (APA) ta encarga cu e parti comercial cual ta un posicion cu antes no tabata t’ey. Arends ta splica cu APA tradicionalmente semper su core-business tabata e actividadnan portuario y aworaki den transicion ta bayendo den un direccion mas comercial. Mester wak bon den e trayecto aki ki servicio lo duna y optimalisa revenue cu lo haya di dje. E parti di crucero, servicio maritimo, real estate y cargo ta puntonan di atencion.
Den e aspectonan aki, e trahamento den team hunto cu socionan ta importante pa yega na brinda un bon servicio. E resultado na final ta nifica mas entrada pa e compania.
Pa hopi aña delegacion di Aruba a bin ta participando den e Global Sea Trade hunto cu Boneiro y Corsou. E trahamento hunto aki awo mester ta enfoca pa mira e tres islanan como un solo destinacion, dunando e pasahero mas balor pa su placa.
APA a haya bon feedback for di liñanan di crucero y bo ta mira cu hopi a cuminsa adapta y busca un acercamento cu e formula ABC. “Akinan bo ta mira cu nos ta hopi bon alinea cu nos hermana islanan. Lo tin diferente encuentro e dianan aki tambe cu e otro islanan unda cu atrabes di aña tambe nos lo tin touch-points akinan pa sigui alinea y busca oportunidadnan hunto como ABC,” segun Arends.
ABC TIN MESUN META
Na final di dia, tur tres isla tin e mesun meta, cada isla ta haci esaki na su manera y ta keda na cada puerto pa haci e na nan mesun forma. E parti importante ta pa duna balor agrega y no competi cu otro segun Arends, pa reconoce cu hunto nos ta complementa otro pa haci proposicionnan di negoshi mas fuerte. “Asina liñanan di crucero por kies e parti aki pa inclui den nan itinerario.”
HOPI BON FEEDBACK PA ARUBA
Den e booth di ABC na e Global Sea Trade tin diferente tipo di hende cu ta para of pasa manera agentenan di biahe buscando mas informacion tocante islanan ABC. Tin coleganan semper para cla pa brinda informacion y hasta mapa of otro materialnan promocional. Di otro banda bo tin partners y liñanan di crucero cu ta bay haci reunionnan, tin biaha representantenan di APA mes ta bishita nan. “E ta dos cos tiki diferente y pa nos e liñanan di crucero sigur ta nos audiencia principal, na final di dia nan ta dicidi si ta inclui Aruba of no den itinerario.”
Den parti di destinacion den caso aki ta traha hopi di cerca cu Aruba Tourism Authority cu ta percura mas riba e parti di promove Aruba cu e producto mes, dus un bon combinacion. APA a haya bon feedback for di varios liñanan di crucero riba con Aruba ta traha riba e parti di puerto, waf y parti di destinacion.
Awor tin hopi proyecto andando por ehempel na edificio di ex-DOW na Oranjestad dilanti di Welcome Plaza, unda APA ta hopi contento di por contribui n’e area akinan no solamente pasobra e ta un monumento, pero pasobra e ta na un localidad hopi importante. E ta net na salida unda e bishitantenan di crucero ta sali. Esaki ta nifica un bon oportunidad pa por renoba y restaura e edificio aki.
Pa loke ta Welcome Plaza, e intencion ta pa haci cierto inversion pa mehoracion si APA haya e maneho riba esaki. Pero tambe embeyece e area un poco, ya cu e ta e prome impresion cu e turista crucero ta haya na momento cu yega. “Nan mester haya un ambiente cu ta invita nan mas pa sigui bay mas den centro di nos ciudad y explora mas tanto posibel den otro partinan di e isla tambe. Nos ta spera cu esey por materialisa.”
‘CRUISE EXPERIENCE DEVELOPMENT PLAN’
Un otro proyecto sumamente importante cu APA a kick-off ta e Cruise Experience Development Plan algun luna pasa. Basicamente esey ta encera un sondeo di waf di crucero pa mira kico ta e cambionan pa haci. “Tabata tin hopi cambio den e industria y mercado. Tambe cierto cambio den e vision pa loke ta turismo crucero. E ta exigi un update n’e puerto p’e proximo decadanan cu ta bin,” segun Arends.
E meta principal ta pa engrandece e experiencia di turista crucero. Pa e motibo aki APA a contrata un grupo di consultant di Walt Disney Cruiselines. Nan ta experto den e parti di desaroyo di puerto y mas. Nan a yuda haci e sondeo aki y a crea un diseño / concepto pa e waf. “Esey ta e prome stap, anto asina ta yega na un masterplan p’e waf pa haci inversionnan necesario. E ta encera tur aspecto, e parti logistica, di vehiculonan, taxi y tourbus, e parti di personanan cu ta cana, tur aspecto cu nos kier mehora. Esey ta un proceso canando caba y unabes e parti di diseño ta cla lo wak con lo bay purba ehecut’e.”
Ta enfoca hopi riba loke ta e low-season unda no ta bay stroba hopi na e operacionnan di crucero pa asina haci e cambionan cu ta necesario.
