Jean-Neida Ignacio, e nieta cu a haci un denuncia contra su wela diamars, a dicidi di bin afo y duna un declaracion di kico realmente a pasa. Den un otro articulo, ta papia cu e wela a fada di e abusonan di e nieta pa cual a surgi un discusion y na final e nieta a resulta herida y e wela deteni, despues di keho entrega.
Por a compronde cu e nieta ta biba na cas di su wela cu su tres yiunan. E ta admiti di a entrega un keho, Tur cos a cuminsa durante un discusion unda cu su wela a saca un cuchiu y herid’e na su cara. “Mi a dicidi cu no ta laga esaki pasa ya cu ta tres biaha cu e ta saca cuchiu den cas. Prome tabata cu mi rumannan y awo cu mi. Pero niun tabatin curashi pa denunci’e.”
Mayoria di e problema y discusionnan, segun Jean-Neida, ta bini a causa di pleito cu e wela ta cuminsa cu su yiunan. Y esey tabata e caso diamars ultimo atrobe. Na momento cu el a bay hala atencion di su wela pa e forma con e ta trata e muchanan, e discusion a bay for di man. “El a chocami, despues a purba dal mi cu un bleki di lechi.” E ta admiti di a pusha e wela, kende despues a saca un cuchiu for di cashi.
E ta bisa cu danki cu el a hala atras, e cuchiu solamente a rasca su cara. A tuma nota cu su wela no a arepenti di loke el a haci, pasobra el a sigui cu discusion y despues a bay warda e cuchiu. Y asina mes, segun Jean-Neida, e wela a sigui atac’e pa cual a dicidi di push’e.
Hopi discusion ta pa motibo cu e muchanan, segun e wela ta bisa, ta laga cos plama den e cas. Semper tin problema cu e wela. Tabata e mesun wela cu a pidi’e na 2022 pa bin biba cerca dje, pa yud’e. Den pasado el a biba eynan caba y tanto e como su rumannan a pasa den e mesun situacion cu e wela.
Debi cu e ta mama soltero, e situacion ta dificil p’e y no ta haya chens di spaar. Pero su meta ta pa busca su mesun cas.
