Director di Aruba Ports Authority (APA) tambe tabata presente n’e conferencia di Global Sea Trade cu a tuma luga na Miami. Aki a trata diferente topico, specialmente esun di sostenibilidad. Ta busca pa Aruba ta un pionero den e parti di sostenibilidad.
Marc Figaroa, director di APA, a splica cu e conferencia di Global Sea Trade ta un di esunnan mas importante den no solamente e industria di crucero, pero maritimo en general. APA su obhetivo tabata pa sinta cu e cruceronan y scucha nan riba con nan ta bayendo, kico por haci miho, unda e crecemento sostenibel por ta, kico APA por haci di nan banda mes. Esaki ta un industria cu ta creciendo y a sa di crece positivamente despues di pandemia.
Na aña 2023, APA a recupera 98% di e cifranan di 2019. Mientras cu 2024 ta mustra un crecemento mas o menos di cuater porciento. A mira un prome kwartaal sumamente positivo y cu un crecemento positivo, den comparacion cu e mesun periodo di 2019. Incluso nan ta enfoca riba un crecemento sostenibel. A cap caba e temporada di high season, pero e oportunidad ta aworaki den low season. APA ta bringando pa mira con pa yena e bashi cu tin. Tabata haya un cantidad di 48 barco crucero pa luna, pero awo ta bayendo na un cantidad di entre nuebe y diesdos barco crucero pa luna.
Segun Figaroa, nan a encamina e vision cu Aruba tin, esta High value, Low impact, di cual nan ta sigui. Esey ta e mensahe hiba p’e cruceronan tambe. E parti maritimo tin hopi e topico di sostenibilidad, cual ta pisa hopi. Nan tin di logra cierto KPI den e parti di maneho di sostenibilidad.
Esey ta loke APA ta bezig cu ne conhuntamente cu Gobierno di Aruba y Utilities di Aruba. A mira cu tin di traha riba e tema di short power, kiermen esey ta tur proyecto cu nan tin den futuro pa mira con pa mehora e experiencia pa tur hende. Tin cierto linea crucero cu ta echt pusha den e parti di nan tours, nan F&B ta completamente n’e parti di sostenibilidad. Incluso nan ta puntra e paisnan kico nan ta haci como destinacion of como waf den cuadro di e tema aki.
Riba e parti di explora short power, Figaroa a splica cu e feedback ricibi ta uno positivo. Di bisa den un reunion di hay’e positivo, mester tin e compromiso (commitment) tambe. E ora ey ta bay haya ora tin henter e business case traha y evalua si e ta un go of no go. E director di APA ta kere cu e mester por ta un go, pasobra esey ta e direccion cu mundo ta bayendo. Incluso e ta kere cu Aruba por ta un pionero den esey.
Pa mas lesa TREMPAN.COM.
