Marc Figaroa, Chief Executive Officer (CEO) di Aruba Ports Authority (APA) ta haya cu e conferencia World Tourism Day 2023 tabata uno ideal pa refresca nos memoria. “Siguramente pa balora loke nos tin.” Figaroa ta bisa cu pa loke ta hospitalidad, esaki ta un topico cu mester keda enfoca riba dje cu ta sumamente importante, y ta loke ta haci Aruba autentico. “Mi ta kere e ta algo cu nos sigur mester conserva pasobra esaki ta nos exito. Nos no tin cu balot’e, ban sigui conserva y proteha nos turismo pa nos sigui ta e miho, y un destinacion top den turismo y pa nos bishitantenan.”
E tema cu ta keda bini dilanti ultimo tempo relaciona cu progreso di nos turismo, ta e cordialidad y hospitalidad di nos hendenan. Figaroa ta haya cu bo por tin bunita beach, pero loke ta haci e experiencia unico pa nos bishitantenan ta nos hospitalidad.
Dia di Turismo ta un bon momento pa tur cu ta traha den sector di turismo pero tambe tur ciudadano reflexiona riba e importancia cu esaki tin pa nos, “pasobra e ta e driver economico, y mi ta kere sigur nos tur directamente of indirectamente ta parti di dje.”
APA ta para tras di union y pa sigui traha duro, p’asina por brinda e miho producto cu tin pa nos bishitantenan. “Den APA, pa cada empleado cu ta traha ta contribui na nos turismo, y asina nos ta sigui bay dilanti. E ta un esfuerso di team.”
