Grupo “End Child Abuse” a sali diabierna cu un manifestacion grandi di vehiculonan den estilo caravana (Drive by) cu e mensahe #TABASTA. Comunidad ta sigui vocifera desprecio contra pedofiel y ta keda para cu mester bin cambio.
For di Linear Park a cuminsa yega hunto y pa 5:00pm tur auto a bay direccion Parlamento. A opta pa haci e drive by pa mantene na e reglanan di distancia social. E grupo aki a bin prepara cu hopi pregunta di cual nan a haci y ta spera contesta riba nan. Pa mas di 20 aña nan ta lucha pa cambia e ley di pedofiel, pasobra esnan cu ta abusa di mucha no ta haya hopi castigo.
E idea di e drive by pa pasa dilanti Parlamento y Bestuurskantoor riba un velocidad pocopoco, pita pa tanto minister- y parlamentarionan tende a resulta den un exito rotundo.Comunidad di Aruba un biaha mas a respalda e grupo aki y a participa axtivamente den e protesta y fungi como e bos di muchanan cu no por defende nan mes. Por a tuma nota di Minister Glenbert Croes cu a ricibi e grupo, como tambe Minister Chris Romero como tambe Minister Andin Bikker.
Manifestantenan tabata bastante abierto y fuerte cu cierto preguntanan y por a nota cu e tema aki ta delicado y ta toca gran mayoria di e pueblo, cu ta bisa ta basta cu abuso tumando luga contra e muchanan inocente di nos pais. Tin cu bin un cambio y esaki mester sosode mas pronto cu ta posibel.
