Home » Maikel Gomes di BCI: Cambio di mentalidad ta clave pa combati sushi ilegal y uzo incorecto di tereno

Maikel Gomes di BCI: Cambio di mentalidad ta clave pa combati sushi ilegal y uzo incorecto di tereno

by Lis

E problema di sushi ilegal na Aruba no ta keda soluciona solamente cu mas baki di sushi den bario of e iniciativa di zona liber.

Segun Maikel Gomes, vocero di Bureau City Inspector (BCI), e retonan grandi cu nos isla ta enfrenta ta exigi den prome luga un cambio profundo cambio di mentalidad di pueblo. A pesar di bon iniciativa di gobierno, manera e uzo di e facilidadnan di zona liber, ainda ta mira hopi desperdicio wordo tira riba tereno publico y riba propiedad priva.

Gomes ta subraya cu pa varios aña caba BCI ta purba di conscientisa comunidad tocante e importancia di mantene Aruba limpi. Sinembargo, ora cu ciudadanonan sigui manda sushi rond den naturalesa of riba tereno publico, e solucionnan structural ta keda limita. E mentalidad di cuido pa nos medio ambiente mester ta un compromiso colectivo.

E balor di e App Fixi pa Aruba
Pa yuda combati e problemanan aki y duna e ciudadano un rol activo, BCI ta bolbe recorda pueblo cu e app oficial Fixi t’ey y ta funcionando caba pa mas di dos aña. E aplicacion ta facil pa uza: 

Con e ta traha: E ta un app facil cu un icono blauw cu un man blanco den dje, disponibel den bo App Store.

Kico bo por meld
Bo por saca potret di sushi cu ta basha rond na diferente luga y, siguiendo instruccionnan cortico den e app, manda e reporte directamente.

Otro iregularidad
Aparte di sushi en general riba tereno publico, e app ta sirbi tambe pa raporta autonan bandona of para riba tereno publico (un tarea cu BCI ta reforsa hunto cu
Cuerpo Policial Aruba – KPA). 

Reglanan tocante tereno di propiedad (Eigendom)
Un punto cu BCI ta pone enfasis riba dje ta e situacion cu terenonan priva. Hopi biaha hende ta pensa cu debi cu un pida tereno ta di nan (tereno di eigendom), nan por haci cu ne loke nan kier.  Sinembargo, Gomes ta aclaria cu maske e tereno ta di bo, ley ta prohibi pa converti bo propiedad den un dump. Tin hende cu ta keda kibra ley y haci bofon di e reglanan, pero e deber di mantene limpi ta conta tambe pa tereno priva, y doñonan por wordo teni responsabel pa esaki.

BCI ta haci un yamada na henter comunidad pa sigui uza e app Fixi, cumpli cu e leynan di pais y yuda cuida nos isla pa e keda limpi y ordena.

Bo por gusta tambe

Adblock Detected

Please support us by disabling your AdBlocker extension from your browsers for our website.