Diabierna despues di 2’or di merdia, despues di un denuncia haci pa agresion na un scol basico y cu intermediacion di SIMAR, docentenan a reuni bisti na blanco na Wilhelminapark.
Hunto nan a cana bay, na un manera pacifico y cu cooperacion di polis, direccion Parlamento, pa asina entrega un carta unda nan ta expresa nan preocupacion. Presidente di parlamento, Ady Thijsen a hiba palabra, despues cu a entrega e manifiesto.
Hunto cu presidente di Parlamento por a nota presencia di parlamentarionan Edgard Vrolijk, Hendrick Tevreden y Sue-Ann Ras, kendenan ta bin directamente for di e veld di enseñansa, como tambe Setty Yarzagaray y Shailinny Tromp-Lee. E docentenan a keda satisfecho cu e parlamentarionan y presidente a baha ricibi e manifiesto.
Comision di maestro, representa pa Xiomara Werleman, a indica riba e topico cu ta nan preocupacion grandi pa loke ta aumento di violencia verbal y fisico na pia di trabao den enseñansa. Nan kier un plan con ta trata situacion asina den futuro. Alabes kier un campaña di concientisacion unda maestro y tur instancia cu tin di haber cu enseñansa ta envolvi.
E carta ta sigui bisa cu e maestronan preocupa, trahando dia aden y dia afo, na bienestar di nos muchanan, ta acerca staten, cu un peticion di urgencia pa loke ta violencia verbal, fisico, psicologico, termento, insultonan personal na pia di trabao y riba rednan social. E maestronan ta sumamente preocupa pa motibo cu varios mayor no ta tene nan mes na reglanan di scol, no tin seriedad pa nos codigo nacional cu a wordo implementa y ta perde tur respet pa maestronan den tur forma. Tabata tin varios incidente den pasado y recientemente un pensionado cu amor y pasion pa enseñansa a wordo agredi riba tereno di scol. E puntonan aki tin nan hopi preocupa. Nan kier un plan y kier campaña, pa asina concientisa riba nan derechonan.
Alabes kier participa den tur e discusionnan riba temanan manera un codigo di conducta pa mayornan na momento cu ta subi tereno di scol, riba entre otro rednan social, mas cooperacion entre mayor, scol, maestro y alumnonan, pa asina concretisa nan y yega na un plan concreto. Motibo di e carta aki ta un peticion pa sinta hunto cu e docentenan pa asina por yega na un plan implementacion y garantisa nan siguridad na pia di trabao. Esaki pa e maestronan ta keda e prioridad number un na Aruba. Kier wak inversionnan wordo haci den siguridad na scol.
Kier pa sindicato y instancianan den enseñansanan ta envolvi. Tin e pensamento cu prioridad ta ser poni den varios otro cos, menos den loke pa e docentenan ta e prioridad number un cu ta na Aruba, riba nivel di enseñansa. E docentenan ta spera un reaccion prome cu dia 3 di April. Presidente di Ady Thijsen a expresa cu nan ta tuma esaki hopi na serio, pasobra loke e docentenan a trece, tin cu tene cuenta cun’e sigur. E trabao di un docente ta uno cu tin cu tene na cuenta cu ta un responsabilidad grandi y parlamento, nan tarea ta pa controla tambe pa esaki tuma luga. Parlamento sigur lo atende cu e asunto aki.
Despues di esey nan a cana bay na Bestuurskantoor, caminda cu nan a topa cu Minister di Enseñansa, Rudy Lampe. El a ricibi un carta tambe di parti di e comision di maestro. Minister Lampe a expresa su palabranan di gratitud na e docentenan presente y tambe na e representante di e grupo, kendenan a organisa e manifestacion na fabor di no violencia. E tambe a bin bisti na blanco parcialmente pasobra e ta di acuerdo cu e peticion aki cu ta biba bao di e docentenan y den nos comunidad. Minister Lampe a pidi den nomber di gobierno, pordon na e juffrouw cu a pasa den un situacion asina fastioso, pasobra e sa cu e docente a dedica henter su bida na enseñansa, ta un bon maestra y aki comunidad a pasa un limite. E no ta aceptabel ora cu un mayor ta dal un maestro/a di scol. Nos tur mester bisa cu esey no ta tolera. Aki a pasa un grens. Na hopi otro pais realmente un situacion asina aki casi nan no ta ni pensa cu e por pasa. Corda pa e pasa. Aki na Aruba nos ta bay asina leu caba cu el a sosode y e ta inaceptabel.
Un maestra of un maestro ta un funcion hopi respeta. Semper e tabata hopi respeta. Minister Lampe, ya kende ta un 60+, ora cu ainda e topa un meneer di scol di tempo e ta mucha, ainda e no ta bis’e na su nomber, e ta yam’e meneer. Asina e respet mester tin den nos comunidad, asina nos a lanta cun’e, pa loke ta e funcion di un maestro of un maestra. E respet ey mester keda y ta responsabilidad di nos tur pa realmente mantene e respet ey.
