Minister Dangui Oduber a haci dos bishita, cual un di nan ta na ATA. El a reuni cu gerencia di ATA. Segun minister Oduber, na ATA e no a haci un bishita oficial ainda, pero a reuni si cu e CEO, sra. Ronella Tjin Asjoe-Croes. Un combersacion orientativo pa haya sa kico e vision di ATA ta, kico ta e maneho y vision di ATA y logicamente comparti cu e CEO di ATA kico ta e vision di e ministerio di turismo, kico ta e liña di maneho cu lo bay hiba.
A splik’e, manera cu a bin ta bisando, desde su periodo di oposicion como miembro di fraccion di MEP, a bisa cu ta boga pa eleva e calidad di turismo. Kier turismo di calidad. Kier mehora e nivel di servicio y a splik’e con lo kier haci esaki.
Ayera tabata tin un reunion entre ministerio di turismo, infrastructura, DOW tambe y ATA mes pa por comparti e vision aki cu nan y un di e desicionnan cu a tuma caba ta, pa wak den e High Rise area, caminda cu mayoria di turista ta hospeda, no ta den e miho estado. A concorda ayera cu lo bay mehora e infrastructura, lo bay trece mas iluminacion y ta bay verfraai tur e area aki na manera cu e ta eleva e calidad y turistanan tambe ta nota cu continuamente tin inversionnan tumando luga pa upgrade e sector aki. Loke a palabra tambe ta cu ta bay wak con ta comparti e gastonan aki entre ministerio di turismo y ministerio di infrastructura, pasobra tin cierto cosnan cu mester wordo haci cu ta cay directamente bao di ministerio di infrastructura y otronan ta cay bao di maneho di minister di turismo. Hunto cu ATA a palabra pa e aña aki caba, turistanan y comunidad mester por nota un cambio den e area aki. Henter e area pa keda cla, lo bay dura algun aña. Paso pa paso lo bay haci’e hunto cu DOW pa na un miho manera evita molester pa e turista pa por upgrade e sector aki. Tambe a splica e CEO di ATA cu ta bay hiba un maneho hopi estricto di controla con e gastonan di ATA ta wordo maneha. A yega di bisa esakinan den pasado y ta ripidi cu kier resultado. Ora cu placa wordo inverti den mercadeo kico, ta e return on investment pa pais Aruba. Cuanto turista a trece aden, cuanto turista a costa ATA pa trece Aruba, cuanto placa e turista a laga atras. Kier mira cu mas y mas kier bay den e direccion di calidad. Kier mira e turista di berdad cu practicamente ta laga su cartera atras den economia di Aruba.
A anuncia den campaña a bisa cu lo bin cu un boutique hotel, pasobra no ta kere den desaroyonan hotelero grandi, sino proyectonan hotelero di escala chikito, boutique hotel cinco strea, di entre 50 y 75 camber, di un nivel di servicio cu Aruba por ta conoce por ehempel un Ritz Carlton, Marriott, Hyatt, pero kier bay un paso mas halto. Pesey a presenta e proyecto di Bushiri. Logicamente tin cu bay encamina e proceso segun ley ta perscribi, cu ta bay tene destaho publico. Ta bay haci un invitacion pa tur esnan cu tin interes den e proyecto na Bushiri, pasobra sa cu den pasado tabata tin hopi interes den e gobernacion di MEP y AVP. E interes tey pa bin cu un proyecto eynan, pero no kier solamente bin cu un desaroyo pa un proyecto hotelero, sino kier haci un combinacion pa duna pueblo bek un beach cu no ta den su miho estado. Kier drecha henter e area, percura pa e santo cu ta landa aden ta santo cu ta custumbra cun’e na Aruba. Pone cafe’s, pone restaurant, pone baño pa publico, pone un cancha di beachtennis, un speeltuin pa mucha. Na Aruba falta di parkenan di recreo pa nos muchanan. No ta bin cu un desaroyo comercial so cu ta yuda economia, yuda cu cuponan di trabao, sino ta bin cu algo pa comunidad por haci uzo di dje. Awor aki tin e ruinanan, tin e beach na banda, cu si mi ta bon, ta un bon beach, pero hopi hende no ta haci uzo di dje pasobra no tin ningun facilidad eynan. Pesey kier presenta e proyecto aki dentro di corto pasobra e gobiernacion ta cuater aña tin pa ehecuta e vision y Oduber ta un hende cu gusta ehecuta plannan mesora. Dentro di corto lo haci un presentacion na comunidad di Aruba pa haya nan sosten tambe. Kier haya sosten di comunidad, na momento cu ta presenta un proyecto, kier pa comunidad di Aruba ta para y aproba proyectonan asina ey. Ta algo cu ta para su tras, pasobra ta algo cu lo duna pueblo bek, un beach cu pa hopi aña no tabata di pueblo. Parti di e proyecto ta destina pa e parti hotelero. Y asina a splica ATA cu na San Nicolas tambe, cu tin desaroyo pendiente pa 16 aña caba cu ta wordo papia di hotelnan di all inclusive, di diferente proyecto cu a wordo presenta. Eynan tambe tin enfoke den proyectonan estilo boutique hotel. Logicamente esun mas facil pa scoge ta bay den direccion all inclusive. Pero kier purba di haya un desaroyador cu por bay den estilo boutique hotel, pa tene den escala chikito. Si pa pabao a haya desaroyador pa bin boutique hotel di calidad sumamente halto, p’ariba tambe mester por tin e posibilidad.
Den liñanan grandi a splica e CEO di ATA kico ta bay ta e maneho y logicamente ATA mester ehecuta e maneho di ministerio di turismo y ta spera cu ta haya e cooperacion tambe na momento cu mester di cooperacion pa ehecuta un maneho pasobra Gobierno tin su maneho y ATA tambe a compronde kico ta e maneho nobo di Gobierno.
