Diabierna mainta a pidi asistencia di Polis na Tanki Leendert, pa un otro caso di ladronicia di wielnan di auto. Henter siman Polis tabata activo den e vecindario pa ladronnan cu ta molestiando habitantenan di e bario, hortando den auto of ta bay cu wiel completo. Den forma relampago y profesional, e ladronnan no ta bay cu 1, sino cu tur 4 wiel completo, lagando e auto riba e bloki atras. Den tur caso e habitantenan ta entrega keho na Polis, pero ainda no ta logrando na gara e ladron ainda.
Te cu awor, e auto preferi di e ladronnan den Tanki Leendert ta Nissan. Siman pasa a bay cu wielnan di un Nissan March y awe marduga atrobe tabata otro Nissan March.
E caso di ladronicia a sosode awe Mainta na e cas Tanki Leendert 135-F. A horta wielnan di un auto marca Nissan modelo March, cu ta un auto di huur. E huurdo, un local, a conta nos cu e bario ta terorisa pa ladronicia di wiel di auto e ultimo simannan aki sin cu por gara e ladronnan. Ta sospecha cu ta profesionalnan ta move den marduga, pa den un forma masha lihe, yega los e tairanan y bay cu e wiel completo.
A entrega keho awe mainta na Polis, sperando cu awor si lo por yega na e ladronnan. Ta pidi tur persona cu lo por a mira algo of por sa mas di e acto aki di ladronicia di wielnan di auto Nissan, pa duna informacion na Polis pa asina evita cu e ladronnan ta sigui cu nan racha di horta wielnan y lagando automobilistanan den gasto innecesario y inespera atras.
