Minister Steven Martina, di asuntonan economico di Corsou, a duna un discurso na un conferencia importante cu un sala yen.
El a conta cu tabata un conferencia di Dutch Caribbean Association of Accountants y e tema tabata desaroyo economico sostenibel. Locual cu a haci, ta duna un presentacion riba desaroyo economico, kico ta tur e oportunidadnan cu Corsou tin, pero tambe con ta percura pa e desaroyo ta sostenibel.
Eynan a mustra diferente desaroyo y tambe e decisionnan complica cu tin cu tuma entre preserva medio ambiente of bay pa e desaroyo economico sin tene mucho cuenta cu medio ambiente.
Semper mester busca un balansa y esey a enfoca riba dje y mustra oportunidadnan cu Corsou tin, decisionnan duro cu tin cu tuma y con tin perspectiva pa sigui desaroya.
Vision
Minister Martina ta sigui comenta cu na e momentonan aki Corsou sigur den fin di e aña aki a conoce cierto proyectonan sumamente positivo cu a los y tambe cu inversionistanan a inverti den dje.
Pa nombra algun, uno ta Marriott Courtyard, caminda cu e financiamento a keda cla y e desaroyo lo bay tuma luga. Pero tambe un proyecto caminda cu tabata tin un hotel cu yama Holiday Veneto, a wordo bendi na vindishi y grupo Conrendon a cumpre. E area cu tin 120 camber, nan ta bay crea 800 camber.
Ta proyectonan basta grandi pa Corsou y hustamente awor aki por mira cu e desaroyonan cu tin, e perspectiva ta wordo crea tambe pa Corsou por recupera su economia y sigui crece bay p’adilanti.
Confiansa den economia
Corsou ta riba e bon caminda. E stabilidad gubernamental ta importante, pero ta demostrando awor aki cu tin un stabilidad gubernamental, segun e mandatario.
Plus, loke a haci tambe ta crea paketenan, areanan caminda cu tin desaroyo potencial y pro-activamente ta acercando inversionistanan y a ripara tambe cu nan ta hopi interesa y cu na modo di bisa, dicidido pa realmente haci e inversionnan necesario.
Sala
E sala a reacciona hopi positivo na e presentacionnan aki y e minister ta contento cu e mensahe a yega.
Bendemento di fruta y pisca
Den e sentido cu e botonan di piscado tabata na Sha Caprileskade, nan tabata percura pa un ambiente pa hopi traficacion. Pero nan tabata percura tambe pa un tiki molester tambe di e forma agresivo pa bende cu nan ta subi riba caya, autonan ta para, etc. Locual a haci awor aki ta, renoba Sha Caprileskade y tambe crea reglanan nobo pa na momento cu nan bin y tene nan mes na dje. Ta hopi positivo cu por a yama nan bon bini y cu Sha Caprileskade, tiki tiki pero sigur, ta haya bida atrobe y ta cuminsa florece un biaha mas.
Peticion
Tabata tin diferente otro idea y plannan pa desaroya e area aki. Dado momento a organisa un dialogo democratico, caminda cu ta invita tur hende cu tin gana, pero tambe envolvi den e area pa nan participa. Ta sali cierto recomendacion.
E recomendacion cu a score esun di mas halto cu tur e otro recomendacionnan, pa e barkitonan bin bek y a adopta e recomendacion eynan como gobierno, cu awe e barconan ta bek.
No ta benta so
E area aki no solamente ta di benta, pero e ta duna Corsou un imagen. E mandatario a splica cu den Caribe, bo no ta mira un floating market hopi. Ta algo cu ta existi pa mas di 100 aña. Sigur ta un atraccion turistico y un di e cosnan cu Corsou por diferencia nan mes den dje.
Cierto reglanan
Tin regla pa e floating market aki. E forma di cuida medio ambiente ta sumamente importante. Tur e reglanan aki, a refresca nan di tal forma cu esnan riba e barco, mester tene nan mes na dje, pa e area keda limpi tambe, minister Martina a enfatisa.
