Nos talentonan local ta sigui cosecha exito riba tarimanan internacional Allymar Maduro “Tribal Kush” residencia na Hulanda y productor di diferente exito internacional, tanto riba plataforma nan conoci manera online streaming como tambe den nightclub.
Dialuna a drenta e grato noticia cu Tribal Kush a wordo nomina den Funx Award como Miho Dj 2024. Aruba, ban apoya nos yiu di tera, cu, hunto cu Kevin Bakker ta forma Tribal Kush. Hunto nan ta cosechando exito rond mundo.
Aki na Aruba tambe, ban demostra cu nos ta apoya nos hendenan cu ta laga e nomber di nos pais den halto. Loke ta hacie mas espectacular ainda, ta cu esaki ta prome biaha c’un Rubiano ta wordo nomina den Funx Award.
Ban nos tur vota pa Tribal Kush. Ta tuma un minuut di tempo pa click riba e link y vota p’asina Tribal Kush por t’e maximo ganado den su categoria.
Click aki riba: https://www.funx.nl/awards/stem
E resultadonan lo ta conoci dia 30 di mei.
FUNX AWARD
FunX Award ta un evento anual organisa pa FunX, un stacion di radio publico Hulandes, enfoca riba musica urbano manera hip-hop, R&B, reggae, y musica electronico di baile (electronic dance music). E premionan ta celebra y reconoce e exitonan di artista- y musiconan urbano Hulandes den diferente categoria manera Miho Artista, Miho Cantica y Miho Album, entre otro.
Generalmente ta determina e ganadonan pa medio di votamento publico y decision di un hurado cu ta consisti di huradonan experto.
FunX Award ta duna un plataforma pa mustra e diversidad i talento riba escenario di musica urbano Hulandes.
