Den fin di siman tras di lomba e ekipo di Van Engelen Giants a disidí ku ta basta awor ku asuntu di invikto i den e promé wega di djasabra a regalá e ekipo di St. Michiels Astros nan promé derota di temporada.
Giants no solamente e propiná e úniko ekipo ku no a pèrdè nan promé derota pero a gana dos wega den e fin di siman pa asina pasa komandá e tabla di posishon despues di 5 wega hunga. E úniko mancha riba nan rèkert ta un wega empatá ku Marchena Reds. Van Engelen Giants a gana e wega 4-2 i e picher ganador tabata Elchero Francisca i mihó bate pa Giants tabata Dylan James di 2-2. Pa St. Michiel Astros e picher pèrdèdó tabata Klevert Martina miéntras ku Tuhedrik Rosa a bai di 2-1.
Seguidamente djasabra, den un wega pèrta, Sta. Maria Pirates a logra un viktoria di 6-5 riba Royal Scorpions. Picher ganador tabata Virjeanelly Rifaela i e mes a bai di 2-1 i Denzell Gregg di 1-1 na bate pa Pirates. Picher pèrdèdó tabata Jadon Gosepa i e mes a bai di 3-2 na bate pa Scorpions. Despues den un wega di hopi kareda, Sta. Rosa Indians a derota Marchena Reds ku skor di 10-8. Picher ganador pa Indians tabata Rowently Windster miéntras ku Stephen Roozendal a bai di 3-3 na bate. Picher pèrdèdó tabata Gedion Baromeo i Richard Donazal tabatin e úniko hit pa Reds. E pichernan di Sta. Rosa Indians por poko a tira nan di dos ‘no-hitter’ di temporada. Por último djasabra, Groot Kwartier Yankees a kai vensí na man di Firebirds Diamondbacks ku skor di 12-1. Picher ganador tabata Edmond Jops i Jervensly Reinita a bai di 3-2 pa Diamondbacks. Ku e viktoria aki e ekipo a haña number di kas ku nan promé viktoria di temporada. Kwartier ketu bai en buska di nan promé viktoria. Picher pèrdèdó tabata Jason Kleinmoedig i Rowgino Josepha a bai di 1-1 pa Yankees.
Djadumingu Kwartier Yankees a hasi lo máksimo pa logra e promé viktoria pero a kai chikí ora ku Marchena Reds a sali viktorioso ku skor di 11-6. Picher ganador tabata Hardleyon Thomasita miéntras ku Keiji Lourens i Joshua Leito ámbos a bai di 3-2 pa Reds. Picher pèrdèdó tabata Richjeandrick Pablo i e mes tabatin e mihó bate pa Yankees di 2-2. Van Engelen Giants a gana Sta. Maria Pirates 13-4. Picher ganador tabata Dylan James i pa Giants tabatin 4 pelotero ku a bai di 3-2, Sophia, Plantijn, Martis i Pieters. Picher pèrdèdó tabata Djenior Mogen i e mes i Meaverson Francisca a bai di 2-2 pa Pirates. Por último Royal Scorpions i Firebirds a hasi kos di bon ruman i keda empatá 6-6. Mihó bateadó pa Firebirds Diamondbacks tabata Edmond Jops di 3-2 i pa Scorpions Jadon Gosepa a tambe di 2-2.
E kampionato di RBI Curaçao 2019 divishon Senior ta kontinuá fin di siman próksimo ku vários wega tantu djasabra komo djadumingu na Tio Daou Ballpark. Por sigui tur desaroyo di e kampionato via di e website nobo www.rbicuracao.com, unda por haña tur informashon, skema di wega, orario i resultadonan. RBI Curaçao tin su propio twitter account tambe bou di @Curacaorbi i ya manera sa kaba tin e página riba Facebook. RBI Curaçao 2019 ta kai bou di ouspisio di Curaçao Baseball Development Foundation (CBDF) i kampionato ta bou di maneho di Fundashon pa Nan. Danki un biaha mas na MCB pa ta spònser prinsipal, Hensley Meulens i por último KNBSB.
