Korsou: Un trabou na drechi riba nos kayanan ta baha iritashon den barionan

Apesar ku Kòrsou ta konfrontando su retonan finansiero ekonómiko ku ta influensia tur area di gobernashon, suskrito ta rekonosé e esfuersonan ku ta keda hasí pa logra mantené i amplia konosementu pa loke ta trata mantenshon di nos kareteranan i adaptashon di nos infrastruktura.

Di otro banda nos tin ku rekonosé ku un kantidat grandi di nos kayanan ta karesé di atenshon. Komo representante di pueblo suskrito ta keda aserká kasi diariamente pa diferente habitante di diferente bario ku na diferente okashon den pasado a aserká otro polítikonan i mandatarionan pa ku e situashon di kayanan ya señalá i ketu bai wardando riba un follow-up of solushon pa nan inkietut.

Un ehèmpel konkreto di un situashon asina ta e situashon na Buena Vista spesífikamente na GRENADAWEG kaminda a konstruí un rotònde riba un T-kruising ku a hala nos atenshon mirando kon e rotònde aki keda. Pa minister haña un bista di e situashon previamente ilustrá un petishon pa tuma nota di e 4 portrètnan anekso.

Komo Parlamentario konsiente di e retonan finansiero ku nos Kòrsou ta konfrontando bo ta puntra bo mes unda e seriedat i e profeshonalismo a keda di e sea kontratista of instansia sea priva of di gobièrnu of personanan ku a atendé ku e adaptashon aki. Tambe e kuestionario ku ta lanta ta ki dia ta kuminsá pone hende responsabel pa e deroche di plaka ku ta tuma lugá ora ta atendé ku entre otro nos kareteranan kon ku ta.

Esaki ta tipo di situashon ku por a evitá i ku netamente ta trese hopi iritashon serka abitantenan di e bario i siudadanonan ora tuma nota di e resultado final ku lamentablemente ta laga hopi di deseá i ta bira innesesariamente kuestionabel pa e minister i tambe tambe pa kontratista i of esnan enbolbí ku e trabounan di nos kayanan.

E ta krea un sentimentu di falta di rèspèt i balor pa ku bienestar i seguridat bou di nos kareteranan.

Netamente tumando na kuenta e situashon finansiero aktual mester skrutina i vigilá kon trabounan ta keda ehekutá. Trabounan di kaya mester keda hasí efektivamente, den otro palabra, ku e debido lógika ku ta kuadra ku e realidat di e infrastruktura. Mester hasi todo lo posibel pa evitá tur tipo di trabou irealístiko ku ta kondusí na desperdisio di plaka ku lo por a keda usa den un otro ámbito. Esaki ta konta sigur pa awor i futuro, p’esei e mindset i aktitut no por keda meskos.

Teniendo kuenta ku tur e situashonnan i aspektonan previamente menshoná suskrito ta hasi uso di artikulo 96 di Reglamentu di Orden di Parlamento pa hasi minister e siguiente preguntanan.

⦁ Ora minister tuma nota di e potrètnan anekso minister por mira e nesesidat pa atendé e situashon di e rotònde na Grenadaweg pa asina trese e seguridat i un tiki mas trankilidat tantu den e bario komo serka e siudadanonan ku ta trafika riba e kaya aki?
⦁ Minister por fasilitá Parlamento e plan di maneho i o kriterionan ora ta ehekutá adaptashonnan na nos kareteranan?
⦁ Minister por indiká Parlamento kon e kontrolnan ta tuma lugá tantu durante komo na entrega di e proyekto final?
⦁ Minister por informá Parlamento si minister ta risibí un relato ora e proyektonan di kaya keda konkretisá i entregá?
⦁ Minister por ilustrá na Parlamento kua ròl i tambe kua ta e responsabilidat ku tantu e Sektor Dirèktùr komo e Sekretario General di e ministerio konserní tin den e trayektonan aki?
⦁ Minister por informá Parlamento si gobièrnu tin un maneho pa tene personanan of instansianan responsabel?
⦁ Si e kontesta afirmativo gustosamente nos ta risibí e maneho aki i si e kontesta ta negativo si minister por informá Parlamento ki dia gobièrnu lo introdusí un maneho asina pa asina kada ken karga responsabilidat pa su trabou?
Ku e mira pa evitá i eventualmente koregí situashonnan ku a surgi pa falta di diligensia i alabes pa mehora e aktitut pa ku ehekushon di e trabou den e area ya menshoná nos ta konta ku Minister lo kontestá nos inkietutnan den un tempu korto pa huntu nos trankilisá, informá i saka lo máksimo pa Kòrsou i nos hendenan.