Ministerio di Desaroyo Ekonómiko(MEO) huntu ku COSME a organisá dianan 1 te ku 3 di ougùstùs último un training titulá “The Coaching Dynamic”.
Esaki tabata un programa dediká tantu pa coachnan eksistente komo esnan ku ta aspirá pa coach empresanan pa eksportá.
Na luna di mei di e aña aki MEO orguyosamente a organisá e promé National Eksport Awareness Week. Ei tabatin un Masterclass Export Coach bon bishitá durante kua e agensia Hulandes RVO a duna un bista di nan instrumentunan i insentivonan ku for di Januari 2018 ta disponibel pa empresarionan di Kòrsou tambe. Mirando e gran partisipashon i e feedback sumamente positivo risibí durante e National Export Awareness Week aki, por a tuma nota kon grandi e interes di parti di empresanan lokal ta pa sa mas di posibilidatnan di eksportashon. Ta un echo indiskutibel kuantu potensial tin meimei di nos empresarionan pa por yega na ofresé nos produkto i servisionan globalmente. Sinembargo hopi di e empresarionan aki ahinda ta karesé di e guia nesesario pa por alkansá e meta aki efektivamente. Pa e motibu aki nos mester di mas coach ku tin e abilidat i konosementu di eksportashon pa por yuda e empresario i por fasilita i guia e empresario pa medio di e insentivonan di supsidio di RVO.
Pues kontinuando den nos afan pa por trese inovashon, krese eksportashon i mehora koperashon entre e diferente stakeholdernan aki na Kòrsou, MEO huntu ku COSME a organisá dianan 1,2 i 3 di ougùstùs último e programa “The Coaching Dynamic”. “The Coaching Dynamic” a enfoká riba ekipá i empoderá coachnan eksistente i tambe esnan ku ta aspirá pa bira coach pa por guia i sostené empresanan lokal ku tin e ambishon pa yega na eksportashon. E programa aki a keda duná dor di trainernan Nat Clegg i Lenni George, ámbos prosedente di e kompania oropeo The Development Alchemist kual a yega di coach start-ups den kompanianan manera Disney, Xerox, General Motors i L’Oreal.
Durante e tres dianan di training partisipantenan a haña e oportunidat pa praktiká diferente téknikanan di coaching usando situashonnan real di empresanan eksistente. E manera kon e training a keda duná ta yuda pa asina den futuro kada coach lo por brinda empresanan lokal konsehonan sólido i progresivo pa ku nan strategia di negoshi.
“Ministerio di Desaroyo Ekonómiko ta konsiderá eksportashon un prioridat, pesei nos esfuerso ta pa habri merkadonan di un banda, inventarisá e potensial di eksportashon di Kòrsou, i kapasitá i fasilitá nos empresarionan pa asina nos logra desenkadená e gran potensial ku Kòrsou tin pa eksportá. Nos Ministerio ta serio den realisashon di e potensial aki.”, Vanessa Toré, Hefe di e sektor di Relashonnan Ekonómiko ku Eksterior a indiká.
