Semper ta responsabel y cumpli fielmente cu bo trabou, esaki tabata palabranan di un ser hopi stima di Omar Boekhoudt na momento cu el a cuminsa traha na aña 1978.
Ken no conoce Omar? Un hende di tur hende y semper cla pa pone ambiente. Dia 1 di juli ultimo Omar Boekhoudt a cumpli 40 aña di servicio na Departamento di Asunto Social e tempo ey yama den boca di pueblo “Inco”.
Riba 1 di juli 1978 Omar Boekhoudt na un edad di 18 aña “pichon pichon” a cuminsa labora como bode na e tempo ey yama Dienst Maatschappelijke Zorg. Tabata net na aña 1978 tambe cu bou maneho di Diputado Casper Boekhoudt (qepd), Dienst Maatschappelijke Zorg dirigi pa e director Clive Lacle (qepd) a habri su portanan na Lagoenweg y Omar Boekhoudt tabata forma parti di e personal cu a cuminsa labora den e edificio nobo.
E tempo ey na momento di pago di onderstand awendia yama bijstand semper tabata tin un peticion special consistiendo di un grupo di dama tanto hoben cu hende grandi, cu tabata kere cu vitamina di wowo tabata drecha nan dia y pesey tabata pidi pa Omar personalmente haci entrega di nan placa di bijstand den un envelop y Omar mas cu claro tabata haci esaki cu mucho gusto pasobra e tabata e yoncuman nechi manera un kenepa di dam.
Omar Boekhoudt ta un persona complaciente, cu bon curason, cu respet pa tur colega specialmente pa hende grandi y semper cla pa yuda. Departamento di Asunto Social kier gradici Omar Boekhoudt pa su dedicacion, atencion na cliente y coleganan y sin lubida un persona leal na su departamento pa 40 aña largo. Pabien Omar!
