Ta hopi instancia Kiwanis Young Professionals (KYPA) tin pa gradici pa nan cooperacion den organisa “Christmas in a Box”. Un proyecto masha bunita. Awe mainta a tuma luga e evento aki den cooperacion cu Fundacion pa Nos Comunidad (FPNC) na Club Kibrahacha 60+. Segun presidente di e club, Mauritz Ras, esaki ta di 10 aña consecutivo cu KYPA ta organisa Christmas in a Box. E ta proyecto comunitario mas grandi cu nan tin pa cada aña Kiwanistico.
E ta exigi hopi tempo voluntario di nan, sigur dos pa tres siman, sin conta e resto di tempo pa planeacion y logistica. Ling & Sons ta un di e sponsornan, cu a brinda nan e oportunidad, apesar di tur protocol cu tin, den henter e situacion actual, pa por a para un fin di siman eynan, pa colecta e productonan.
KYPA ta asina afortuna di a ricibi asina hopi producto e aña aki cu por bisa cu e ta un proyecto un biaha mas exitoso. A cuminsa cu un target di 60 basket. Y mirando e cantidad di producto cu a ricibi, mester a aumenta esaki te na 100 basket. Ta un aumento di 160% den e caso aki. Ras a indica cu nan ta sumamente gradici na comunidad, na comercio cu a yuda den e caso aki, sea ta di duna sponsor, di duna prijsnan special. Ta gradici tur cu a partner e aña aki cu Fundacion Pa Nos Comunidad, caminda cu a alivia 100 famia pa e luna aki y e lunanan venidero cu e basket cu nan a haya.
Ta papia di un proyecto balora na mas di 25 mil florin. Cada un basket tin productonan di prome necesidad, te na cuminda y asina por sigui menciona. Cada un basket tin practicamente e mesun producto den nan.
Drive Thru
Na luga di bay cas pa cas, a haci’e den un forma di Drive Thru. Ras a indica cu a partner cu FPNC. Normalmente ta bay via scol cu ta otorga nomber na KYPA y ta bay na cada bario. Mirando e situacion, a bisa cu lo bay cu e fundacion cu tin nan base di dato mas actualisa y cu cada famia cu tin mester, ta haya. No cu si a haya ta bolbe haya. Tur famia cu mester den e caso aki, a haya y selecta pa e fundacion.
Unico condicion cu KYPA a pone den e caso aki ta cu cada famia mester tin mucha den nan. Na final di dia, como organisacion internacional, KYPA ta sirbi cada mucha di comunidad di Aruba. Esey ta e unico condicion cu a pidi pa por cumpli cun’e. Siguramente por bisa cu ta sumamente gradicido na FPNC, cu a duna e oportunidad pa traha hunto cu nan e aña aki.
Fundacion pa nos Comunidad
Liandro Loopstok, kende ta coordinador di proyectonan di Fundacion Pa nos Comunidad (FPNC), a conta cu e fundacion ta sumamente gradicido na e bunita gesto di KYPA, pa un motibo cu nan a haci un proyecto asina bunita, trahando diferente basket pa yuda e Fundacion parti e paketenan aki na su clientenan.
E fundacion ta yudando mas of menos 5 mil cliente. Esaki tur dia ta varia. Ta pesey no por duna un dato specifico. Esaki ta clientenan cu ta registra na e fundacion y cu trahado social ta tuma contacto cu nan y asina nan ta ricibi ayudo.
Fundacion ta man habri pa tur organisacion y e proyectonan cu nan kier haci. Semper nan ta mira e beneficio pa e clientenan di e fundacion. Por ultimo Loopstok a bisa cu e fundacion ta sumamente gradicido na henter e team di KYPA pa e bunita gesto, mirando cu tin e siguridad. Fundacion ta sumamente gradicidi pa tur granito cu a yuda cun’e.
