Un rato pasa, alrededor di 2:15pm, un biaha mas polis mester a presenta den Cantaloupestraat den Dakota pa atende cu e conocido Kevin Banfield, di apenas 22 aña di edad, cu atrobe a kibra tur cos den cas di su wela. No ta mucho dia pasa cu nos a entrevista su wela, un hende grandi caba y cu a suplica na instancianan concerni yuda su nieto.
Ta obio cu tur e supuesto profesionalnan no a ni yama e wela of haci un intento pa yuda Kevin Banfield cu su problema. Na luna di juli ultimo nos a cubri un noticia tambe ora cu a core cu ne for di Centro Colorado na San Nicolas. Ey tambe a purba yud’e cu su problema di adiccion y comportacion, pero dor cu e no por a atene su mes na reglanan di e centro, a opta pa core cu ne tambe.
Awe atrobe, debi cu e no por comporta y ta lanta cu e wela den cas, a yama polis cu a deten’e y transport’e pa ward’i polis. E wela ta man na cabes atrobe. No sa kico mas mester haci pa yega na un solucion.
E wela nunca a imagina cu na grandi, ora e mester sosiego pa e biba na paz, cu awo e tin cu atende cu nieto malcria y cu problema serio di droga. El a bati na tur porta, a yama tur instancia, a papia cu politiconan, tur hende ta primintie ayudo pero ningun ta cumpli. E ta spera cu dia cu e nieto haci algo mas serio contra dje, pa e ora no tende cu ta lamenta y cu ta bin papia di Social Crisisplan atrobe di kico nos “lo por a” haci. Awo ta ora pa pone accion!
