E piscadornan y tambe otro ciudadanonan cu kier mantene e cultura, historia y tradicion, ta topa diasabra mainta 8or na Waf’i Rancho. E encuentro aki mainta ta pa papia of reuni pa asina stop e intencion di e inversionista Venezolano cu a cumpra e hotel pabou di e waf. Den un forma strategico y kier logra haya e caminda entre e waf di piscador y e hotel cu el a cumpra. Mas bien e kier hunga e wega di kier embeyece, pero realmente e kier logra pa haya e espacio pa asina e por haci negoshi cerando e caminda. Esaki no por pasobra aki ta e piscadornan ta perde.
E historia di e Waf’i Rancho ta uno cu ta bay decadanan atras. Awe un miyonario Venezolano cu no por inverti na su pais, a cumpra of traha dos Condominium caba y awor a cumpra e ruina di hotel Mar Azul y kier purba bira doño di loke tin rond tambe. Si cera caminda nifica cu e piscadornan no por pasa ora cu nan kier manera awor aki. Si cera caminda nifica cu e cumprador di pisca no por yega cu nan auto pa cumpra.
Ta haci manera ta un fabor ta haci e piscador of cumprador di pisca dor di duna dos espacio pa para nan auto. Cos no ta bay asina. Pesey e reunion aki ta hopi importante na Waf’i Rancho Diasabra mainta 8or. Si e inversionista kier embeyece e area rond di su hotel, e por hacie. Pero den e proceso purba cera pasada lo bira un problema.
Si el a bende su proyecto cu un plan pinta cu e pida entre waf y e hotel, e mester a chek esaki prome pasobra e pida cu el a pinta no ta di dje. Si APA of Gobierno entrega loke e piscadornan tin den nan poder awe, nifica cu e minister concerni y tambe APA ta contra nos Arubianonan.
E waf su historia y custumbernan mester keda. Un Minister no sa kico ta pasa na Waf’i Rancho. E ta bira mandatario pa un rato y ta sinta den Cocolishi. E mandatario no sa e dolor di e piscador of kico ta pasa ora pueblo yega pa cumpra su pisca. Pesey ta spera tambe cu gobierno y APA no haci cos scondi y laga e piscador y e pueblo cumprado di pisca perde acceso cu nan tin awe.
