Aruba a habri su frontera atrobe dia 1 di december ultimo, locual a rekeri cu mester a haci mas esfuerzo pa keda proteha nos mes, nos bishitantenan y comunidad completo door di sigui e protocolnan di higiena y distanciamento social stipula pa gobierno. Departamento di Salud Publico hunto cu otro autoridadnan, ya pa varios luna ta inspecciona diferente establecimiento pa e Gold Seal. Na e momento aki ta controla “otro tipo di acomodacion” pa e protocol di COVID-19.
Taxistanan ta un segmento cu ta importante pa cu e transportacion di nos bishitantenan, pues lo haci un accion pa e taxistanan y asina brinda nan e oportunidad pa ricibi e Gold seal. E accion aki lo ta un cooperacion di diferente departmento, entre otro Departamento di Salud Publico, Departamento di Transporte Publico, Dienst Technische Inspecties y tambe Cuerpo Policial Aruba.
Durante e accion aki lo haci un control riba e siguiente puntonan;
- Keuringskaart valido
- Exploitatie y rijvergunning valido
- Rijbewijs valido
Criteria mandatorio pa cumplimento di protocolnan di higiena:
- Bisti tapaboca (mask) na tur momento cu tin interaccion y/of un (of mas) cliente den e vehiculo
- Hand sanitizer disponibel pa e taxista y cliente(nan)
- Limpia e areanan den vehiculo mas uza / areanan cu ta mishi frecuentemente (manera porta/ door handle/ stoel), despues di cada cliente
- Ventila (ontlucht) e auto pa algun minuut despues di cada cliente
- Mantene un lista di contacto (cu nomber, telefon, hotel/adres, fecha)
- Tin un borchi visibel cu bo nomber, telefon y number di taxi
Ta pidi tur taxista pa tuma nota di e puntonan menciona aki riba y pa tin tur cos na ordo. E accion aki cu lo tuma luga riba diabierna 11 di december 2020. E taxistanan cu ta cumpli cu tur rekisito lo ricibi e “Gold seal” di HH Code.
