Mi tin e conviccion cu tempo cu partido MEP a compila e famoso rapport ‘Feestvierend ten ondergaan’,siguramente nan a haci esaki cu vision pa nan mes un futuro ora cu a base di engaño y manipulacion logra drenta gobernacion. Pa esakinan si MEP ta campeon di visualisa futuro.
Door di malgastamento di placa di pueblo na biahamento sin ningun escrupulo y sin tene consideracion kico pueblo en general, principalmente nos pensionadonan, ta pasando y bibando aden, nos Aruba ta confrontando actualmente cu un Aruba sushi nunca bisto. Awa “sushi” contamina a bira un fenomeno cu awor ta casi tur parti di Aruba ta wordo confronta cu ne.
Nos isla ta parce cu tin un volcan cla pa explota, pero no cu lava manera volcan nan na otro parti di mundo cu ta spuit “lava” ,pero un volcan cla pa spuit awa sushi di pos. Sin menciona e gran cantidad di sushinan di casnan residencial cu ta wordo benta clandestinamente den nos mondinan ful rond di Aruba. Tur esakinan a consecuencia di un ego di un minister cu kier resalta cu e si tin e curashi di a cera dump na Parkietenbos sin tene cuenta cu e consecuencia desastroso di esaki pa cu nos comunidad en general.
En bes di a haci un estudio responsabel y haci esaki gradualmente, a djis core cera dump y pa despues haci propaganda y gaba cu su decision descabeya. Sigur mi tin comprension pa esunnan cu ta residencia den e bisindario di e dump na Parkietenbos, principalmente ora ta deshaci di sushinan toxico. Pakico no a tuma un decision pa sikiera prohibi e sushinan toxico menciona entre otro y laga espacio pa pueblo por sigui tira su sushinan residencial cu ta por ehempel matanan, piedranan etc. Laga e productonan toxico pa e companianan experto cu tin e manera o experticio pa deshaci di e sushinan aki. Logicamente cu un control riguroso na dump pa verifica cu no ta tira sushi-y desperdicionan toxico eynan.
Mi no ta un experto riba e materia aki pero un persona cu poco sentido comun sigur lo no a bay haci manera e minister aki cu ta kere cu e lo ta e sabelotodo y en bes di trece un solucion, a empeora e situacion di sushedad mas ainda. Keto bay tin reclamo di candela entre otro na dump na Parkietenbos. Kiermen no a soluciona e problema na dump y pa colmo a hiba e problemanan aki tambe den barionan, mondinan di nos Aruba. Esaki ta ora bo tin nobatonan cu kier resalta y ta tuma decisionnan descabeya sin importa e consecuencia di esakinan. Aki mi ta culpa e gobierno en general tambe pasobra con bo ta laga un nobato haci y deshaci na su antoho pasobra e ta yudado como gobierno pa keda den poder? y asina ta sigui malgasta placa di nos pueblo pagado di belasting na gran escala y sin miedo, manera e lema cu nan mes a inventa den campana anterior. Kiermen sin miedo. Pueblo por wel di sufri pero ta nos ta manda y pueblo mester keda keto.
Atrobe mi kier a accentua cu e problemanan di awa sushi, Bubaliplas, e sushedadnan/ desperdicionan na gran escala tur parti riba nos isla no ta un hecho pa haci politica, pero mester enfrenta e asunto aki cu seriedad y responsabilidad prome cu esaki sali completamente for di man, si e no a sali caba en todo caso. Mester stop cu gastamento di placa di pueblo na biahamento y bin cu solucion prome cu ta laat.
Na final, mi ta cita un dicho famoso: “No existe animal en el mundo mas peligroso que un ignorante con poder!”
