Junta Central Electoral a suspende eleccionnan nacional municipal pa e fracaso di voto automatisa, cu a impedi masha hopi Dominicano eherce nan derecho di voto.
Julio Cesar Castaños Guzman, a bisa cu e eleccionnan no por a wordo realisa pasobra e boleto electoral no a encarga den e demarcacionnan unda cu e voto automatisa lo a uza.
E eleccionnan a keda suspendi den full e pais, sin importa si e eleccionnan lo a wordo realisa cu voto manual of automatisa.
A bisa cu lo bay cuminsa cu un investigacion profundo pa determina e rasionnan pa cual e boletonan electoral no a carga. “Nos ta afronta e consecuencianan cu responsabilidad,” e presidente a bisa den un rueda di prensa pa 11’or y 11 di mainta.
Ta trata di un decision historico sin precedente den historia di politica di Republica Dominicana, cu a tuma luga procesonan electoral cu regularidad estableci den e Constitucion di e Republica desde 1962, tras e caida di e dictadura.
E problemanan cu e voto automatisa a cuminsa for di anochi, ora cu e personal di JCE a bolbe na e recintonan electoral despues di 5’or di atardi pa trata di “soluciona problemanan cu a surgi cu e boleto electoral electronico.”
Delegado di partidonan politico opositor a denuncia cu e ekiponan tabata tin problea pa carga e boleto di manera electronico den su totalidad, y hasta a presenta problemanan cu e carga di e lista di concurentenan.
Diadomingo mainta a presenta inconvenientenan inumerabel pa cuminsa cu e proceso di votacion den demarcacionnan di Gran Santo Domingo, Santiago, Puerto Plata, entre otro. For di oranan tempran di mainta tabata tin filanan largo den e uranan electoral, sin embargo e personanan no por a vota debi na e problemanan tecnico presenta den e ekiponan di e voto automatisa.
Na Aruba tambe nan kier haci mesun cos den e siguiente eleccionnan, y mirando con e votacion electronico a fracasa na e pais Caribense aki, por mira hopi controversia na esaki.
Ta di spera cu por tira un bista riba esaki prome si e ta confiabel. Tambe nos por tira un bista na Merca durante eleccion di 2016, caminda tabata tin reclamo di parti di oponentenan na e partido Republicano, cu pa motibo di “fraude electoral”, debi na votacion electronico, Presidente Donald Trump awe ta na mando. Ta bon pa tira un bista riba e fenomeno aki pa mira si esaki ta mas conveniente na Aruba, of miho nos keda cu e sistema tradicional di votacion manual.
