Apesar di e emocionnan di docentenan di Colegio San Nicolas (CSN), John Hessen di Inspectie Onderwijs tin comentario positivo di e encuentro. E tabata un reunion pidi door di e cuerpo di docente di Colegio San Nicolas pa aclarea un rapport traha door di Inspeccion di Enseñansa cu no a consulta cu nan.
For di dialuna mainta cu minister di enseñansa Rudy Lampe a expresa su mes riba resultado di un investigacion na Colegio San Nicolas, e bala di reaccion a cuminsa lora. E forma con e mandatario a expresa su mes a hostina e docentenan y mas ainda cu nan mes no a haya ni copia di e rapport. Esaki a conduci na un reunion cu Inspeccion di Enseñansa.
E parti principal den e reunion a bay riba e analisis di e rapport. Hessen a splica e procedura cu lesrooster ta cana. Ta traha e lesrooster y directiva ta mand’e pa Inspeccion di Enseñansa, cu mester controla si e ta traha segun e ley y segun e lessentabel stipula. Ta traha un analisis di loke nan a constata y ta manda esaki pa autoridad concerni, kende ta e minister di enseñansa.
Den e reunion a bini dilanti nomber di docentenan, cu tabatin klas pa yena nan puntuacion den e sistema unda cu ta sigui desaroyo di e studiantenan. Cada docente a duna di su banda e motibo pakico e cifranan no ta entrega. Den e reunion a bini dilanti diferente motibo pakico e cifranan no ta yena entre otro e sistema a cambia y e no tabata funciona. Cada un a bisa cu nan no tabata nan culpa. Tur esey a keda confirma tambe door di Management Team, kendenan tambe tabata presente. “Nan a confirma cu esey tabata e motibonan.” A palabra tambe cu den e relato di e reunion aki lo pone un splicacion di cada docente pakico e puntuacionnan no tabata poni. Specialmente cu no tabata nan culpa.
Hessen a bisa cu na momento cu nan a bay controla a constata cu tabata falta puntuacionnan. E ta un ‘moment opname” cu por resulta cu despues di algun dia, ora cu e situacion a drecha, a yena e cifranan. Cada biaha cu haci e control di momento, ta mustra esaki na Management Team y Directiva y e autoridad concerni.
Inspeccion di Enseñansa di su banda a cumpli pa scucha y haci palabracion. A palabra cu lo reuni frecuente cu Management Team y ora cu ta necesario, lo reuni cu representantenan seccion di cada vak, ora cu tin problema cu cierto vaknan. E ta admiti cu tin cierto cosnan a surgi door di falta di comunicacion, pero pesey a yega na e palabracionnan.
