Temporada di fin di aña ya ta tras di lomba. Nos a come dushi durante e dianan aki y porta te hasta cumindanan no muchu saludabel. Pero awo scol a cuminsa bek, e rutina di tur dia a cuminsa atrobe dus esey kiermen cu nos tin cu cuminsa come saludabel tambe.
Tin biaha tempo ta core bay laga nos parti mainta, como mayor bo ta druk ta preparando bo mes pa bay trabou y pa hiba bo yiunan scol. E consecuencia ta cu den bo pura bo no ta haña chens pa prepara desayuno, dus porta bo ta cumpra un pastechi of croquet na caminda pa bo yiu pa e tin algo den stoma. Si esaki sosode de bes en cuando no ta problema, pero si e bira un rutina no ta bon. Ta importante pa muchanan come saludabel mainta, esaki ta trece hopi benificio pa bo yiu su comportacion durante oranan di scol especialmente parti mainta.
Dicon ta importante pa desayuna?
Desayuno ta hopi importante pa hende di tur edad tanto mucha, hoben y adulto. Si bo desayuna bo ta siña miho na scol, presta miho na trabou, bo ta mas activo y yen di energia durante henter dia. Un mucha cu ta desayuna ta alerta na scol y ta capta instruccion mas liher. Ademas e mucha tin mas energia durante dia. Desayuno no mester ta algo mucho pisa y complica pa traha.
Tin hopi manera simpel, lihe y saludabel pa haci esaki.
Tips pa un desayuno lihe:
- Cereal cu lechi lowfat
- Sandwich di pan bruin cu jam of 1 slice di beleg. E sandwich ta contribui cu fibra, mineral y vitamina.
- Cracker
- Lowfat granola of mueslibar
- Desayuno instantaneo (p.e. “Wake-up”, “avena instantaneo”). Papa avena ta yuda wanta hamber y ta yuda baha cholesterol.
- Fruta, esaki ta contene hopi vitamina
- Yoghurt
- Chocomel
- Juice 100%
Ta bon pa mucha come 1 pa 2 porcion di fruta tur dia. Un porcion di fruta ta: 1 fruta tamaño mediano of ½ cup di fruta fresco corta chikito of 1 cup di juice di fruta fresco.
Kico ta sosode si bo yiu no desayuna?
- Bo yiu tin tendencia di come mas snack of cuminda den ora di atardi of anochi
- E por haña dolor di cabes
- Su concentracion ta poco
- E no tin suficiente energia durante dia
- E ta haña soño na scol.
Pa conclui. Evita cu bo yiu ta bay scol stoma bashi. Si no tin mucho tempo parti mainta, prepara su desayuno anochi prome cu bo bay drumi p.e. traha y paketa su sandwich; cushina papa, etc. Parti mainta ta djis sak’e for di frigidair. Y sin lubida, e desayuno mester ta saludabel esaki ta importante pa su concentracion na scol pero tambe pa su desaroyo fisico y mental.
