Durante un ceremonia na sede di Garage Centraal na Sabana Blanco, a haci entrega di 4 auto cu Ministerio di Husticia a busca pa Guarda Nos Costa. Minister di husticia Andin Bikker tabata presente na e momento di entrega tambe.
E mandatario a expresa su satisfaccion pa yegada di e momento aki y a bisa cu tin 4 mas na caminda. For di momento cu a institui Guarda Nos Costa como un servicio riba su mes, e departamento aki tabata y ta instrumental den combatimento di actonan ilegalidad na costa di Aruba. Principalmente basa riba e presion cu pandemia tin riba paisnan den region.
E mandatario a gradici su coleganan di Gabinete Wever Croes cu ta duna atencion na e parti aki di husticia. El a pidi su disculpa cu e peticion a tarda un tiki, pero ta trata di provee tur e servicionan cu e materialnan necesario.
Gerente di mercadeo di Garage Centraal Rodney Kock a splica cu e autonan entrega ta dos I10 Grand y dos Isuza D-Max. Den un siguiente biaha lo bini 4 vehiculo mas. Kock a gradici mandatario y e departamento pa e confiansa deposita den e compania pa haci entrega di e vehiculonan aki.
E pick-up ta un vehiculo cu un tremendo modelo di hopi durabilidad mientras cu e I10 Grand ta un vehiculo di bon nomber internacionalmente.
