Atleta Olimpico di Taekwondo Monica Pimentel a habri su scol Impact Taekwondo Aruba despues cu el a regresa y e stichting ta existi pa un par di luna. Na luna di februari nan a cuminsa y a participa den varios campeonato nacional.
E ultimo campeonato cu nan a participa aden tabata e Costa Rica Open y a bay cu Maelynn y Nathan Fradl. E resultado tabata hopi bon unda cu a bin cu medaya di oro y brons, di cual Impact Taekwondo Aruba ta contento.
Nan ta sigui prepara, unda cu na fin di luna lo tin un campeonato nacional. E campeonato lo ta dia 29 y Brazil Taekwondo Stichting a organisa esaki. Despues lo tin e campeonato internacional aki na Aruba organisa tambe pa Brazil Taekwondo Stichting hunto cu Mundo Taekwondo, asina Pimentel a bisa.
Pimentel nunca a pensa cu e lo tin un scol di su mes y a tuma e decision cu apoya di su famia, kendenan a push’e. Hopi hende a puntr’e cu nan kier hinca nan yiu den taekwondo y awo e tin grupo di muchanan chikito y un grupo cu ta bay competi. E grupo di competencia ta consisti di e categorianan infantil, cadet, juniors y adulto. E muchanan cu tin entre 4 pa 5 aña no ta competi ainda.
Den e grupo di muchanan chikito tin 20 y esunnan cu ta bay competi ta 10 pero tin cu no ta cla ainda pa competi, el a bisa. Tin hopi interes den e deporte di taekwondo, pasobra a ripara esaki durante campeonato nacional cu hopi mucha ta practicando e deporte. Tin hopi talento y Monica Pimentel ta spera cu su presencia por sigui promove e deporte aki cu ta uno hopi sano y leuk.
Muchanan ta gusta e deporte di taekwondo hopi. Tambe e ta kere cu taekwondo ta trece algo bon pa sociedad. Esunnan cu kier join e scol di Monica Pimentel por bay riba e facebook page Impact Taekwondo Aruba y por manda un mensahe via facebook of pasa cerca nan riba diamars y diahuebs di 6-9:00pm of diasabra di 4-7:00pm.
Pa Rouel Baarh e experencia den Impact Taekwondo Aruba ta unico. “Nunca mi a bay den un team asina aki y cu hopi capacidad,” Baarh a expresa. Loke ta atrae di e deporte ta e union y team, pasobra si no tin niun hende pa push otro, no ta bay padilanti. Su meta ta yega un dia Panamericano of otro campeonatonan y e ta desea di representa Aruba unda cu ta.
Jayzion Cornes tin 10 aña y ta haci e deporte di taekwondo. E ta gusta e deporte aki pasobra si algo pas’e ora e ta grandi, e por proteha su mes, asina Cornes a bisa. Su meta ta pa haya su faha preto y pa asina bay un campeonato y gana esaki. E ta contento di ta forma parti di e scol Impact Taekwondo Aruba, unda cu nan ta train hopi duro y Cornes gusta esey.
