Dos persona a fayece durante un tiramento na un zorgboerderij na Alblasserdam. Ta trata di un hende muhe di 34 aña fo’i Alblasserdam y un hoben di 16 aña fo’i Dordrecht.
Un mucha homber di 12 aña fo’i Hendrik-Ido-Ambacht y un hende muhe di 20 aña fo’i Alblaserdam, a resulta gravemente herida, segun polis di Rotterdam. Tambe tin un herido leve.
Poco despues di e tiramento, a detene un homber den un park na Alblasserdam y a confisca e arma di candela. Ta trata di un homber di 38 aña fo’i Oud-Alblas, un pueblo no mucho leu di Alblasseram. E homber ta deteni y interoga. Polis ta investigando cas di e sospechoso.
Ainda no sa nada riba e motibo di e sospechoso. Polis ta kere cu el a actua su so. Ora cu e homber a drenta e boerderij y a cuminsa tira, tabatin hopi hende presente.
E homber no tin antecedente penal, pero si sa cu e sa haci bochincha frecuentemente. E homber lo a keda n’e zorgboerderij anteriormente. Segun Algemeen Dagblad, a base di informacion acumula, ta trata aki di un tal John S. di Oud-Alblas.
Gemeente di Alblasserdam ta papia di un dia scur. Alcalde Paans a bisa cu nan ta solidario cu e famia di e fayecidonan. “Hopi hende cu tabat’ey presente n’e zorgboerderij tabata testigo di e tiramento,” e alcalde a bisa den un rueda di prensa.
ZORGBOERDERIJ
E homber a cuminsa tira poco prome cu 11:00 am rib’e propiedad di e zorgboederij situa riba Molensingel, pafo di e gemeente. E servicionan di emergencia a acudi masalmente, incluyendo dos helicopter.
Rib’e website di e zorgboerderij, ta bisa cu ta duna trabao principalmente na mucha, hoben y adulto cu un incapacidad of malesa mental. E zorgboerderij tambe ta ofrece alohamento na hoben y adulto cu mester di gara rienda di nan bida bek, por ehempel como parti di un proceso di integracion.
A yama Slachtofferhulp y ta studiando si ta necesario e asistencia di specialista p’e grupo vulnerabel cu ta traha den e zorgboerderij.