Alberto Groeneveldt ta pasando un dushi vakantie na Panama e momentonan aki. Ora e bolbe e lo tende cu e tin cu duna cuenta dilanti hues pa maltrato serio di bestia.
Diferente acusacion tin contra Alberto Groeneveldt. Normalmente caso di negligencia ta bay un TOM Zitting y duna un multa. Pero esaki ta un negligencia extremo pa cual a dicidi di manda e caso corte. Esaki ta prome caso di negligencia di animal cu Aruba a mira cu a yega corte, asina leu cu por corda. E mester sirbi como ehempel con Aruba mester comporta specialmente cu su mascotanan.
Groeneveldt ta acusa di, den e periodo di prome di januari 2024 te 26 di maart 2024, varios biaha y sin ningun meta y surpasando tur loke ta permiti, intencionalmente a haci un bestia (un cacho di nomber Khaleesi) dolor y/of causa e cacho herida y/of a perhudica salud di e cacho, dor di laga e cacho pa tempo largo mara na un cadena demasiado cortico y inadecua y/of a keda sin duna e cacho e cuido necesario, dor di keda sin duna e cacho cuminda y/of awa pa e bebe y/of cuido pa su heridanan y/of remedi.
E ta wordo acusa di varios biaha, den e periodo di prome di januari 2024 te 26 di maart 2024, como doño di un of mas cacho, a keda sin cumpli cu su obligacion di duna e cacho(nan) aki e cuido necesario, door di duna e cacho(nan) insuficiente cuminda y/of di duna e cacho(nan) insuficiente awa y/of di keda sin duna e cacho(nan) cuido medico necesario di un veterinario y/of di keda sin duna e cacho(nan) suficiente espacio pa nan move.
