Diaranson mainta, Prome Minister Evelyn Wever-Croes a atende un reunion hunto cu Minister Rob Jetten y Minister Mark Harbers di Hulanda, hunto cu tur e isla/ paisnan den Reino. Presente durante e reunion tabata Prome Minister Gilmar Pisas di Corsou, Prome Minister Silveria Jacobs di Sint Maarten, y e Gezaghebbernan di Boneiro, Saba, y St Eustasius.
E topico di e reunion tabata e agenda climatico, na unda cu durante e reunion cada un a firma nan compromiso pa cu e ocho puntonan stipula den e agenda. Prome Minister a indica, cu e firma aki Aruba ta duna su compromiso pa sigui den e pasonan pa yega na cumpli cu e metanan pa haci Aruba un pais mas sostenibel y fuerte contra e cambionan climatico.
Manera ta conoci, cambio climatico ta bin debi na e temperatura cu ta aumentando, y esaki por ta sinti den yobidanan mas fuerte, cu ta ocasiona daño na nos careteranan, coral y beachnan.
Prome Minister a indica cu e idea pa yega na un agenda di clima pa henter Reino, a nace aña pasa na Aruba durante e conferencia di Energia & Clima cu Aruba a organisa hunto cu Minister Jetten. Aki ta unda Aruba a duna su compromiso, y Hulanda a compromete nan mes pa pone fondo disponibel pa asina yuda Aruba, Boneiro, Corsou, Sint Maarten, Saba y St Eustasius.
Cu e firmamento di e agenda climatico, e paisnan a yega na un acuerdo climatico cu ta consisti di ocho punto.
E puntonan ta inclui;
1. pa acelera e transicion di energia y pa tin miho acceso na energia limpi y pagabel;
2. pa tin un infrastructura resiliente pa cu e cambio climatico;
3. pa mehora e maneho di awa y di desperdicio;
4. pa stimula un economia circular y sostenibel;
5. pa intensiva proteccion di e ecosistema;
6. pa bin cu incentivonan economico y financiero;
7. pa traha mas hunto y comparti e sabiduria y conocemento cu nos tin;
8. pa monitoria y evalua.
Esaki ta e acuerdonan cu tabata palabra y firma durante e reunion, na unda cu Hulanda lo pone fondo disponibel pa e paisnan den Reino por cumpli cu e puntonan aki.
Prome Minister a expresa di ta sumamente satisfecho cu e resultado di e reunion aki, na unda por mira cu despues di e conferencia aña pasa, aworaki tur cos ta birando mas concreto na unda Hulanda lo pone su fondonan y cu e ta dispuesto pa yuda nos logra cumpli cu e agenda climatico.
