Aruba tin un situacion fastioso cu vivienda. Casnan ta birando dia pa dia mas caro y no ta partiendo tereno pa traha cas nobo pa algun tempo caba. Durante Foro di Adulto mayor organisa pa Minister Ursell Arends, a sali na cla cu tin un proposicion riba mesa pa introduci heffing ora stranhero (turista) cumpra cas cu despues ta haci esaki un vacation rental (AirBNB). Nos a puntra director di Departamento di Impuesto (DIMP), Luenne Gomez-Pieters ta con impuesto ta mira e posibilidad aki.
DIMP ta mira e asunto aki como un preocupacion cu nan tambe tin. “Nos ta mira entrada di overdragsbelasting ta subi den forma mucho mas lihe cu añanan anterior.” Esaki tabata un señal cu nan tabata hayando, mirando cu nan ta cobra impuesto y si esaki ta subi ta mira na costo di kico e ta aumenta. DIMP su plan no ta den solamente incentivo fiscal, pasobra cu fiscalidad bo por of facilita actividad economico of frena cierto consumo of uzo di cierto cosnan. Si pensa por ehempel ora di hisa tasanan di accijns of invoerechten, ta pa purba di frena un poco e uzo di por ehempel alcohol, sigaria, etc. Cu subida den tasa di impuesto bo por frena cierto di e modanan cu ta mirando awor.
Na final di dia, aki 20 pa 30 aña, bo lo kier pa bo ciudadanonan tambe tin un vivienda, nos hobennan cu ta studiando tambe. E ta algo cu DIMP ta haya feedback di dje y tin riba agenda pa atende.
Ora cumpra un cas, tur acta notarial tin overdragsbelasting. E pregunta ta unda e posibel aumento aki pa cumprado stranhero di cas lo ta hinca. Segun DIMP e lo ta hinca tambe den e mesun overdragsbelasting, loke si no por haci ta discrimina. “Djis pasobra bo ta stranhero bo ta paga un tasa mas halto, pero si por bin cu un regla caminda bo ta hisa e impuesto aki riba compra di un segundo cas, y no ta importa si ta local of stranhero. Pues si ami tin un di dos vivienda, e turista su overblijf ta afo, dus esaki ta su di dos vivienda, ta carga un tasa mas halto. E ora tambe por acapara e problema di e manera eynan.”
Ta inclui esaki den e mesun overdragsbelasting caminda cu e tasanan lo ta diferente pa un di dos vivienda. Akinan no ta papia di bay introduci of haci un heffing nobo cu ta basa riba e balor di e cas cu cumpra, esaki ta den e heffing existente bo ta mira con por atende cu esaki. Lo mester midi despues si tin su efecto tambe pasobra no ta tur cos tin e efecto cu tin biaha ta calcula. E ta un cuestion di introduci un cambio den ley y midi tambe su efecto cual ta spera cu esaki lo tin si, segun director di DIMP ta comenta.
