Huesnan tin un trabou importante den comunidad. Nan mester tin tur herment disponibel na nan alcance pa por traha di forma agradabel. Pa algun siman caba e huesnan di Aruba ta traha al estilo di couchi boulo.
Esaki ta nifica cu nan ta traha manera tempo cu Aruba no tabata conoce e modernismo di awendia. Hasta awendia tin autonan cu camaranan cu ta haci cu spielnan en realidad no ta necesario mas. Pero den Corte, hues ta manera e hendenan di antes cu tabata uza bela como iluminacion.
Prome cu decada 2020 a cuminsa, edificio monumental di Corte a pasa den un renobacion y a construi un pida moderno. Na april, 2021 a haci entrega di e edificio cu a keda masha bunita mes. Despues di esey, aña pasa durante reces a keda di haci algun mantencion.
Por a constata for di inicio di aña pasa cu bou di e blafon tin capa artistico riba cual e luznan ta pega. Pa un motibo of otro e banda drechi di e capa aki a cuminsa sak. E miedo si lo yega un dia cu esaki por cay. Pero e problema mas grandi ta e iluminacion. Hopi lihe e luznan a cuminsa kima. Prome un, despues dos.
Awo e situacion ta alarmante pasobra di e total di 20 luznan cu tin den dak cu mester brinda suficiente iluminacion pa tanto hues, griffier, fiscal y abogadonan por lesa e dossier bon, mayoria ta daña. Por a conta cu tin 12 luz daña y solamente 8 ta brinda iluminacion!
E solucion cu a busca y cu no ta bisto (bunita) pa e diseño cu e arkitecto tabatin den mente ta cu a pone dilanti hues, fiscal y griffier un desklamp, cu bombio briyante pa brinda suficiente claridad. Ta tristo mira hues cu un lampi asina grandi banda di dje y e calor cu esaki ta manda.
Ta spera cu por mehora e situacion mas lihe posibel!