E trahadonan di SABA tin un mal contento y hunto cu nan sindicato SEPPA a presenta cerca Minister di Adulto Mayor Ursell Arends. Aki nan a entrega un carta cu e puntonan cu cu e trahadonan no ta di acuerdo cu ne.
Magaly Brito, secretario general di SEPPA, a indica na minister cu den e ultimo lunanan tabatin un situacion alarmante, e constante discusion den prensa entre fundacion SABA y gobierno. Cada partido ta argumenta nan posicion, cada uno cu su rason si of no, pero SEPPA ta kere cu ta momento cu cada partido fria nan cabes y sinta na mesa pa habri caminda p’e dialogo y yega na solucion.
Entre henter e discusion aki ta e trahadonan di SABA. Na final tin punto cu ta hopi importante pa nan. Un di e puntonan aki ta e tema di recht trekking di cual di hopi tempo nan ta exigiendo algo di esaki y no tin claridad. A duna minister tur tempo y espacio pa haci un investigacion si ta berdad e placa a bay pa SABA of si gobierno ta esun cu debe e trahadonan aki.
A nota e reaccion di e ministernan anterior tambe a bisa cu nan a pasa den e problemanan aki, nan tambe no tin claridad n’e temanan aki y ta sostene pensamento di Arends pa tin un claridad como drecha e situacion. E sindicalista a indica cu di ta kere cu na cierto momento cualkier fundacion of instancia cu ta ricibi placa di pueblo, mester por responsabilisa nan mes na un manera corecto y transparente con e placa ta uza. Tambe si ta destina realmente pa unda e placa ta bay.
Nan ta para p’e reglanan. A tuma nota di diferente rapport y nan ta fastioso, p’esey ta di pensamento cu na mesa di dialogo por discuti si tin rason of no. Brito a entrega e carta na minister Arends y ta en espera di un contesta di e mandatario riba esaki. Nan a entrega cantidad di carta riba e situacion di SABA.
Minister Arends a elogia sindicato SEPPA pa con nan ta hibando e caso di SABA y a bin dilanti pa trece e puntonan di preocupacion. E mandatario a sigui bisa cu e recht trekking ta data di 2002 y cu esey ta un bay y bin. A bisa tanto SEPPA como Raad van Toezicht cu a yega momento p’e discusionnan aki mester para. P’esey a haci e investigacion pa por duna claridad si ta gobierno mester paga, of si e fondonan aki ta paga caba. E mandatario a indica cu si resulta cu gobierno mester paga, nan lo asumi nan responsabilidad pa haci esey.
E ta spera cu e discusion publico por termina y pa bay bek na mesa. E discusion publico, e discusion politico cu ta tumando luga, ningun partido lo sali gana. Ta momento pa yega na mesa. Durante e reunion di Ministerraad e lo informa di a apunta un comision pa yuda atende n’e puntonan aki y yega na un solucion.
