Hubert Zievinger, kende ta un Legendario den aviacion, ta yudando Fast pa logra AOC (Air Operator Certificate). Su experencia ta pa yuda e team logra e meta di yega na e AOC y pa opera. Esaki no ta facil y tin hopi trabou pa haci. Zievinger ta den calidad di funcion como safety y quality manager p’e team.
E tin 2 funcion cu tin pa cumpli cu tur rekisito p’e aerolinea por opera na un manera safe y cu e calidad ta keda semper na prome luga. E no ta nada facil y hopi trabou. E tin un edad avansa caba, y su deseo ta guia hendenan mas jong cu por cuminsa den e proceso pa tin mas interes den aviacion.
Esaki ta prome biaha cu un cargero ta yega teritorio di Aruba pa haya su AOC. Ta bringando p’esey y tin basta pa haci ainda, mester aproba manualnan y ta spera cu pronto por keda cla. Asina aki pa tin tur cos na luga y por opera, kitando e registracion bieu pone nobo cu ta riba dje caba. Pa por brinda Aruba un servicio di carga, cu pa prome biaha den historia tin un avion cu registracion di Aruba opera den region.
Den pasado hopi a purba busca AOC pa Aruba y no a logra. Segun Zievinger, e tabata traha cu varios compania cu a purba den pasado. Nan a yega te na e momento di produci e parti economico, esta e placa, y eynan tur cos ta cay na awa. Ta hopi importante pa esnan cu ta interesa tene esey den consideracion y riba caya no ta haya e personal zomaar. Awendia ta dificil pa haya personal cualifica, specialmente cu hopi experencia di trabou.
Zievinger tin mas di 45 aña experencia di aviacion, ya cu el a cuminsa dia 12 december 1969 cu ALM. El a traha 10 aña cu e compania y ya caba den su di 2 aña Zievinger a logra haya su licencia como vlucht adviseur pa KLM. El a logra su opleiding na Hulanda, y despues di 10 aña trahando cu nan Zievinger a bay biba eynan. Na Hulanda el a traha cu hopi compania grandi, manera North West Airline y Singapore Airlines. E tabata despecha tur cargero grandi 747. Despues el a bin bek Aruba y traha pa Air Aruba. A purba cu mas compania cu lo por awe ta operando, pero no tin e fondonan necesario pa mantene e proceso.
Esaki ta simplemente e comienso y e avion chikito aki lo cuminsa bula entre e islanan. Tin plannan pa expande y bin cu avionnan mas grandi, mas capacidad di carga p’asina bula mas leu. E avion aki ta un poco limita, unda cu por carga 900 kilo. Ora tin un avion di 6 of 7 ton, por ta mas flexibel den transporte.
