Den un e-mail manda na tur miembro ayera nochi, Jose Dirksz, Presidente di Sindicato di Polis (SPA) a invita pa un SPOED ALGEMENE LEDEN VERGADERING cu lo tuma luga diabierna awor, dia 15 di mei 2020, pa 2:00pm na Compleho Deportivo Frans Figaroa na Noord.
Unico punto riba agenda ta e contesta di Gobierno riba e carta manda. SPA ta pidi su miembronan un mandato di kico ta e siguiente pasonan cu miembronan kier pa e sindicato tuma.
Manera ta conoci, SPA a entrega un carta na Minister Andin Bikker, encarga cu maneho di Husticia di nos pais, den cual ta haci algun peticion, entre otro cu Polisnan ta “First Responders” specialmente den e pandemia aki. Ta suplica pa tene cuenta cu e realidad aki den e esfuerso di Gobierno pa reduci salario y beneficionan, den e pakete di medida ehecuta pa Ministernan Wever-Croes y Maduro. E sindicato sinembargo a haya un indicacion caba di e contesta y no ta satisfecho, pa cual lo laga e decision final den man di miembronan.
