Pa motibo di escalacion di e situacion di COVID-19, Curacao Medical Center (CMC) a cancela tur operacion di dialuna dia 22 di maart y diamars 23 di maart cu no ta relata na un emergencia. Pashentnan lo ricibi yamada di departamento di planificacion di CMC pa traha un otro cita. CDC lo haci un anuncio pronto si lo mester cancela e resto di operacionnan di e siman aki. Tur cita na policlinica si ta sigui normal.
Te cu diadomingo atardi, e cantidad di pashentnan interna den hospital cu COVID-19 a yega un total di 23, di cual 11 ta den Cuido Intensivo y 12 ta den departamento di COVID-19. Di e 23 pashentnan, 4 ta di Boneiro pa motibo cu Corsou a extende ayudo na e isla ruman, cu no por atende tur nan pashentnan di COVID-19 den nan hospital.
E aumento di casonan a pone cu e departamento di Cuido Intensivo mester a bira completamente dedica na COVID, mientras cu pashentnan di Cuido Intensivo cu no ta relata na COVID a bay pa e departamento di curason (CCU).
Specialistanan a tuma nota di un aumento di pashentnan mas hoben entre 30 y 40 aña di edad, cual no tabata e caso prome. Esaki posiblemente ta resultado di e variante nobo Britanico.
CMC a tuma nota cu hopi pashent infecta cu COVID ta acudi na departamento di emergencia sin tuma contacto cu nan dokter di cas prome. Ta pidi pa bay bo dokter di cas, pa evita cu ta contagia mas pashent wardando na departamento di emergencia. Dokter di cas lo avisa si mester bay emergencia y lo asisti den e proceso.
