Diaranson mainta Gobierno a invita SADA y su miembronan pa un presentacion di Departamento di Recurso Humano riba e salarishuis cu e partidonan ta den discusion riba dje. E presentacion aki a tuma luga na aula di EPI na Sero Blanco.
Presidente di Sindicato di Aduana di Aruba (SADA) Edward Maduro, a bisa pa cuminsa cu nan a haya invitacion aki for di director di Duana. E tema ta relaciona cu e impasse cu a surgi entre e partidonan despues cu Gobierno a informa di no por cumpli cu e Convenant di juli, 2017. Gobierno a dicidi di yama un reunion of un presentacion pa tur e miembronan di Duana den cual nan kier a duna un splicacion of e proposicion cu nan tin pa e miembronan di Duana.
Den e presentacion aki, segun Maduro, hopi cos a bini dilanti y e empleadonan a haya un miho bista. E tabata importante pasobra tabatin hopi informacion no corecto cu ta saliendo di parti di Gobierno pa loke ta procedura cana pa yega na un structura nobo di salario, na momento cu tabata den un reorganisacion.
No por keda sin menciona cu hopi miembro a keda sin acudi pa motibo cu nan ta di pensamento cu esaki ta un station pasa caba. Tin un acuerdo firma y nan no ta dispuesto pa hala atras riba esaki. E sindicato SADA a bisa cu nan no ta haci nada sin nan miembronan, pasobra na final ta e miembronan ta dicidi kico ta acepta of no. E miembronan cu si tabat’ey a haya un miho bista di loke ta intencion di Gobierno.
Maduro a enfatisa cu e acuerdo ta un documento cu no por bay discuti mas riba dje, pasobra e esfuersonan anterior a wordo haci door di un Gobierno valido, y cual a sosode den cooperacion cu Mediador di Gobierno. P’esey si mester bay Corte, SADA lo haci esaki, pasobra esey ta e decision di e miembronan. No por t’asina cu despues di 22 luna ta bin bisa cu no ta respeta e Convenant firma. A confia cu Gobierno ta bay cumpli cu su palabracion durante e 22 lunanan cu a combersa riba e tema aki. “E convenant aki por wordo compara cu un contracto colectivo.”
