Recientemente nos tabatin e honor di conoce Anthony Arends. Un nomber cu kisas a yega scucha pero no conoce. Otronan sa ken e ta, pero no conoce e talentonan cu e tin y cu a hib’e awe na un posicion den mundo di espectaculo Hulandes. Un Arubiano cu ta poniendo su marca den mundo di espectaculo riba e mercado Hulandes.
Arends a mira e cambio na caminda y ta un di e empresarionan, cu su compania DEAL, cu a cuminsa move for di e swing urbano y dirigi mas atencion riba loke Afro. Asina el a haya e reconocemento pa su Afro National Festival (nan) y O.A.K Festival (One of A Kind)
E reisnan di Anthony ta hancra na su inicio na aña 2014, como road manager di nada menos Jeon y Ritmo Real na Hulanda. Esaki a brind’e oportunidad pa crea un netwerk cual a permiti’e sigui desaroya y crea un nomber den mundo di entretenimento.
“Na comienso di 2015 mi persona tabata organisa / yuda organisa fiestanan pa e cultura di ABC. Despues cu mi a cuminsa mi estudio na cabamento di 2015 na Event Academy mi a bin den contacto cu tres promotor y asina nos a uni forsa pa organisa nos prome fiesta Urbano na Hulanda, cual tabata formidabel”.
Cu hopi entusiasmo Anthony Arends ta conta cu e prome evento ey a marca su destino, pasobra a mira e potencial den e area pa cual a dicidi di registra un compania di entretenimento. Asina a registra DEAL Entertainment na september 2016 na KVK.”
Con bin e nomber DEAL. Esaki ta facil. E ta forma pa e prome letter di cada partner di e tempo ey: Dennis, Edison, Anthony, Loran. Pero awe, dos aña mas leu, a keda dos partner solamente di e cuaternan cu a cuminsa hunto: Edison Warner y Anthony Arends. “Nos tin tambe un team completo cu ta yuda nos den tur evento. Un parti di e team aki a cuminsa cu nos na 2017 y tin un parti cu ta hendenan cu a join nos despues di Covid-19.”
Desde e inicio ey, a percura pa sigui crece y no keda stanca na un flow so. “Durante cu añanan ta pasa nos a bin ta crea hopi mas concepto cu no ta solamente Urbano. Aworaki nos ta organisa entre otro: Formidabel, esaki ta un concepto Urbano; Afro Nation, esaki ta un concepto cu ta focus riba e genero Afro; Una Noche, ta un concepto cu ta focus riba e genero Caribbean/Latin y Criola, cu ta un concepto cu ta focus riba e cultura di Cabo Verde.”
Papiando riba OAK Festival, el a conta cu esaki ta uno cu el a crea na 2019 p’asina pa prome biaha organisa un festival cu tur e conceptonan hunto. E bunita tabata cu riba un solo anochi a haya un skina cu stage Urbano, uno Afro y otro di Caribbean/latin. “Esaki tabata un exito total yegando asina na un cantidad di casi 5500 hende cu a atende e fiesta aki.” Esaki ta motibo cu riba 9 di december 2023 lo tin e di tres edicion di OAK Festival na Maassilo Rotterdam!
BON TRAYECTO
Practicamente tur loke cu a bini desde 2015 te cu awe ta lesnan cu a yuda Anthony acumula experencia, di kico ta logra y kico no, formulanan cu por funciona y pa cual tipo genero y e publico.
“Mi a organisa hunto cu Eldwin Kock y Edson Jr Tromp Paranda ‘Rubiano na maart 2023. Esaki tambe tabata un exito total! Por a mira e cobertura completo riba www.24ora.com . Cabamento di april 2023 mi a yuda organisa Tropical Valley. Esaki tambe ta un cu ta pasa pa e buki, nos a organisa e prome concierto bek pa NastyPlay aki na Hulanda despues di basta aña!”
Afro Nation Indoor Festival 2023
El a recorda cu Afro Nation ta un concepto cu el a skirbi na 2017 como un proyecto pa scol. “Mi a mira cu tabata tin e demanda pa Afro pero ningun club of promotor tabata kier a tuma e riesgo pa organisa full un fiesta Afro. Locual ta di compronde. E tempo ey Afro no tabata mesun conoci cu e ta aworaki, door di artistanan manera Burna Boy, Davido y Wizkid.”
Yen di entusiasmo hunto cu su team a bay p’e proyecto nobo ey. Prome cu tur cos, e mester a logra haya un fecha habri na un luga cu lo hala hende. E prome paso ya caba tabata bon pasobra hopi lihe a haya un fecha pa organisa Afro Nation pa prome biaha den Villa Thalia Rotterdam. “For di e prome biaha ey semper nos a sold out tur nos club editionnan.”
Pero e ta corda tambe cu na 2018 “nos a face reality ora nos a draai nos prome perdida den e mundo di evento ora nos kier a organisa un Afro Nation Festival banda di lama. Nos no tabata tin e conocemento ainda di kico ta come y bebe den e mundo di festival. Esaki ta totalmente otro cu club editions. Aki abo mester regla tur cos di A te cu Z. Despues di e les aki nos a keda organisa club editions y asina nos a logra na cabamento di 2018 bay Belgica tambe cu e concepto aki te cu awe.”
Tabata aña pasa cu Arends y DEAL a bolbe haya e reto pa organisa un festival atrobe, “y nos tabata cla pa esaki”.
Nos a pone un record como e prome indoor festival di afro aki na Hulanda. Normal bo ta haya concierto di artistanan di Afro pero nunca un festival cu 3 stage y cu 3 diferente genero di afro. Nos tabata tin stagenan di Afro house/Tech, Amapiano y Afro Beat/ Pop. Nos a logra sold out e evento aki 3 dia prome cu el a tuma luga, es decir 3 dia prome cu e evento bo no por a haya ticket ningun caminda mas. E edicion aki a bira uno historico, principalmente pa mi persona cu ta bin di un isla chikito y cu tin un di e fiestanan di Afro mas grandi di Hulanda. Asina mi a logra tambe host e afro stage e aña’ki na PAL MUNDO Festival pa prome biaha.”
Den 2023 e exito a ripiti cu sala sold out. “E energia, e publico y e zonido a zorg pa henter anochi tur hende por a gosa, baila y pasa un bon tempo hunto.”
Pa finalisa, e ta bisa cu e por mira atras cu satisfaccion. “Si mi wak 7 aña despues kico Afro ta haciendo mundialmente, e ta toch yena mi cu un orguyo cu mi por a wak algo 7 aña pasa y kere aden ora tur hende a bisa cu mi ta loco. Afro aworaki ta un di e generonan cu ta creciendo mas lihe mundialmente, vooral Amapiano. Si bo wak hopi artista conoci tambe ta cuminsa bay mas riba e genero aki. Tuma un Ozuna como ehempel, kende a caba di saca full un album cu influencia Africano aden. Si nos tuma un artista local, JEON, kende a caba di saca “Welcome to my city” cu tambe tin influencia Africano aden. Mi ta kere pa aworaki nos lo sigui tende mas di e generonan ki y pa e decada cu ta bin e lo sigui crece.”
