Henley Davelaar ta demanda Serlimar pa “Golden Handshake”

E ex-Director di Servicio di Limpiesa di Aruba, esta SERLIMAR Sui generis, a entama un demanda contra e compania. Esey a sosode recientemente via di su abogado mr. Chris Lejuez. E ta demanda pa nan pag’e locual, ta coresponde na dje, basa riba e acuerdo di trabou firma entre e compania cu ne. E demanda ta encera cu SERLIMAR no tabatin un motibo valido pa kibra e relacion di trabou den forma abrupto asina. Fecha pa tratamento di e caso civil ainda no ta conoci.

Henley Clemens Davelaar a cuminsa traha cu SERLIMAR na October 2018. El a bin for di Corsou pa por bin eherce e funcion aki na Aruba. Bou su encargo a muda e compania pa un edificio masha caro mes na Pos Chikito y el a percura tambe pa e “financial lease” di e trucknan pa e compania. E tambe tabata para cla pa yega na un acuerdo pa un incinerator, cu lo a costa hopi placa y cu mester a aumenta tur e tarifanan di e compania pa por a cubri e formula aki di maneho di desperdicio.

Pero e maneho no a conta cu aprobacion mas, despues di cambio politico den Gobierno. Manera ta conoci, na december 2019 Otmar Oduber mester a baha como Minister pa su colega di partido Marisol Lopez por a asumi dicho funcion. Oduber a bisa e tempo ey di lo baha pa su salud. Asina cu Lopez a asumi poder na inicio di e aña aki, a tuma nota cu cosnan no ta cana manera debe ser den SERLIMAR. Y no a dura mucho, apenas un luna den e funcion, Minister Marisol Lopez a dicidi di retira Davelaar for di funcion. Y no solamente e Director, pasobra tres luna despues a core cu e Presidente di Hunta di Supervision tambe, cu a keda man crusa ta permiti mal maneho den e compania.

Tratamento di e caso civil aki di SERLIMAR lo por bira un asunto interesante, no solamente civilmente pero tambe penalmente. Esaki pasobra pocopoco ta biniendo señalnan for di Hulanda cu tin un investigacion interno y externo andando na SERLIMAR cu lo por contesta varios preguntanan cu ta habri. Tin sospecho cu tin hende a enrikece nan mes cu placa di SERLIMAR, cu de facto, ta placa di pueblo. Pues, e caso civil por bolter den un caso penal, den cual Davelaar lo hay’e ta splica “na placa chikito” ken of kendenan a dun’e instruccion pa maneha e compania di tal forma cu awor e ta bancarota.

Banda di posibel hechonan castigabel, tambe ta papia di casonan di conflicto di interes pisa den e compania, den cual ta haci negoshi cu famia of esunnan yega na ehecutivonan den e compania. E proceso di recluta empleadonan nobo tampoco tabata bayendo den un forma transparente, den cual famia y amigonan tabata drenta como empleado cu salarionan halto, sin cu nan tin e estudio pa esey. Den mundo di promocion tambe a yega na algun “deal” cu personalidadnan, cantante, Diskjockey, Locutornan y Periodistanan cu de facto, na moda di bisa, tabata riba “payroll” di SERLIMAR, bou capa di propaganda pa uza nan imagen riba trucknan di sushi of pa promove den nan programanan di radio, television of riba internet.

Claro cu legalmente e Director ta responsabel pa e maneho diario di e compania y ta duna cuenta y rason na e Directiva cu su Hunta di Supervision. Eynan tin ora e relacion ta mucho cerca y enbes cu esun ta controla e otro, nan ta traha hunto cu otro y ta bira masha “amigo”. Asina na SERLIMAR por ehempel a percura pa huur un cas pa e Director por biba aden, pero e contract a pasa via casa di e Presidente di e Hunta di Supervision di e compania. Den cualkier regla di “bon gobernacion”, algo asina lo no ta permiti. Y por lanta e pregunta cuanto e Presidente por controla e Director si e “debe e fabor” ey.

E caso por bolter tambe den cual, pa defende su nomber, su imagen y pa logra cobra e locual e ta kere e merece, Henley Davelaar lo mester conta e berdad na Hues, aunke cu esey por nifica cu e lo tin cu tira algun figura “bou di bus”. E lo ta capas pa haci algo asina? De facto e por, pasobra e ta bay biba despues bek na Corsou y no lo mester atende cu esunnan cu cay den e proceso aki na Aruba. Pero, te unda nan lo por culpa e mes tambe di e maneho, no ta conoci. Hecho ta cu Gobierno a kita e Presidente di Hunta di Supervision, a kita e Director y a move e Director Financiero den su puesto bieu, kita tur su poder y a emplea un otro Director Financiero pa mira si por salba e compania ainda.

Abogado mr. Geert Rep awor ta e representante oficial di Corte como “bewindvoerder” den SERLIMAR

Legalmente tambe e caso ta masha dificil, pasobra Corte a otorga SERLIMAR un status di “surseance van betaling” den cual ta bira dificil pa bay demanda placa di un compania cu tin sosten di Hues pa por restructura. Ainda e “Bewindvoerder”, esta abogado mr. Geert Rep, lo tin cu dicidi si e mes ta tuma e caso pa defende SERLIMAR of si e lo permiti pa abogado mr. David Kock, cu ta esun cu ta brindando servicio legal na SERLIMAR, si e mes lo defende e compania.