BRA: Region Caribe tin un temporada di horcan hopi activo


Dialuna awo e temporada di horcan ta cuminsa y e aña aki pa region Caribense esaki lo ta hopi activo, asina ta indicacion di modelonan. Hopi biaha horcan ta keda net pafo di region Caribense y e aña aki algun lo drenta e region. E investigacionnan di universidad y proyeccion ta mustra cu Caribe lo mira un aña hopi mas activo.

Loke a hala atencion di Bureau Rampenbestrijding Aruba (BRA) ta e parti zuid Caribe, esta e islanan A-B-C, normalmente no ta topa cu hopi actividad. Segun Rino Hermans di Bureau Rampenbestrijding Aruba, tin dos cu lo pasa den e “trash hole”, entre 80 cu 140 nautical miles. Pa nan no ta importante cuanto of con grandi, un tropical storm cu un bon yobida, Aruba ta den un situacion di inundacion.

Aruba ta conoci pa inundacion, hospital ta den inundacion, tin e situacion di pandemia y mester cuida e capacidad di hospital. Ta keda na pueblo pa cuminsa prepara, pasobra despues di un awasero tin sangura. Por haya epidemia di dengue, kiermen ta den un situacion cu no ta alarmante pero si no prepara, e lo bira un momento fastioso pa tur hende.

Bureau Rampenbestrijding Aruba ta conseha tur hende cuminsa prepara nan mes pa alivia, pasobra nan tin 3 luna caba cu no sa cuanto tempo mas e pandemia lo dura y exigi energia di e organisacionnan. A saca e plan caba di horcan, unda cu DOW a cuminsa 100%. Tin cu prepara p’e temporada di horcan manera tur aña ta haci rooinan limpi.

Ta keda na ciudadano cu sa ta spera conforme e modelonan awasero, purba di tin cosnan cu ta carga awa pa criaderonan di sangura. Den horcan awa a cobra mas bida di hende compara cu biento. Hopi hende ta preocupa pa biento, pero Bureau Rampenbestrijding Aruba ta preocupa pa awa. Cada 10 victima di horcan, 8 ta di awa.

BRA: Region Caribe tin un temporada di horcan hopi activo

BRA: Region Caribe tin un temporada di horcan hopi activo. Click e link pa mas https://24ora.news/3eyj7vD

Posted by 24ora on Saturday, May 30, 2020

Tin e plan di crisis y e team di crisis ta uno stabiel den e ultimo 5 añanan. No a bin hende nobo acerca. E mesun team a train hunto durante e ultimo añanan y tin experencia. Tin debilidad pa loke ta material logistico, tin cansancio cu ta hunga rol door di 3 luna di pandemia. Pa dia 9 di juni e crisis team lo sinta hunto pa mira con nan ta prepara pa sirbi pueblo den e temporada halto. E plan di horcan no lo cambia hopi, unda cu tin 3 shelter. Aruba ta parti den 3, esta Oost, Central y West, y den cada parti tin 1 shelter, pero tin mas punto di contacto. E punto prome ta pa scapa bida y si den un situacion tin virus, aki ta trata di un situacion secundario.