Su maneho ta anti-Serlimar: A bula cabes di Giovanni van Wijk

5890

Un rato pasa a sali un carta di retiro for di Cocolishi den direccion di Presidente di Hunta di Supervision di SERLIMAR, esta Giovanni van Wijk. Ta trata aki di un homber di confiansa di ex Minister Otmar Oduber. E tabata, te cu awor ey, ocupando e puesto mas importante den directiva di e compania Sui generis di Gobierno.

Bou su maneho y bou su supervision, a manda e compania practicamente bancarota. Ta parce cu e Minister nobo, no ta di acuerdo cu su maneho y decisionnan y mescos cu a haci cu e Director General y esun Financiero (di e tempo aya), awe ta toca turno na Presidente di e Hunta di Supervision.

Giovanni van Wijk ta amigo personal y den pasado sponsor di ex Minister Otmar Oduber, tempo e tabata traha na Drive Motors. Awendia e ta man drechi di e mandatario y bou su mando, a permiti e desaster financiero na Serlimar. De facto, e ta “personalmente” responsabel pa maneho di Serlimar y e falta di control. Tabata dificil pa e controla, si el a permiti pa su mesun casa haci negoshi cu Serlimar, siendo e mes ta den Hunta di Supervision. #conflictodiinteres

Esaki ta un otro persona di confiansa di e lider di POR cu ta pasa bou di e guillotina na Serlimar, debi na mal maneho of na cortamento di gastonan. Otro caranan conoci cu tambe no tabatin suerte di keda cu poder tabata e ex Director, Hensley Davelaar. Mesun cos a conta pa Errol Henriquez, cu tin un compania cu ta haya un cantidad di trabou cu Serlimar, sea ta riba dump di Parkietenbos of riba e landfill na Ser’i Tijshi.