Henley Davelaar di Corsou ta bira Director di Serlimar

323

Serlimar Sui Generis awe a anuncia cu, después di un proceso di solicitud cu a inicia na mei e aña aki, cu a apunta Henley Davelaar di Corsou den e funcion di Director di e compania, entrante 23 di october.

E lo ta e persona cu lo tin e responsabilidad pa guia e compania y su empleadonan cu e vision nobo y implementa e metanan cu ta inclui entre otro; e expansion di e servicionan di Serlimar S G.

Henley Davelaar ta un experto den Economia y Finanzas. El a nace na Corsou y eynan el a finalisa su estudionan na nivel di HAVO. Despues el a continua su estudionan avansa na Hulanda. Trempan den su carera el a gana hopi bon experiencia trahando den e sector di “offshore” y a specialisa den “Venture funds” y “Mutual funds”. El a ocupa posicionnan den gerencia importante den e sector Textil, Software, IT, sector Petrolero y den Telecomunicacion. Recientemente na Boneiro, Davelaar a traha hopi di cerca cu e autoridadnan Hulandes riba e parti di maneho di medio ambiente y di desperdicio.

Cu e nombramento aki, Serlimar S G ta garantisa su clientela y e pueblo di Aruba cu compania lo bay funciona cu un maneho basa riba innovacion y servicio di calidad na bienestar di henter nos comunidad.