Despues cu ayera mes a logra rescata e dos militarnan cu a sobrebibi e caida di e Helicopter na 12,5km leu di Aruba, mesora a cuminsa trabounan den lama pa localisa e Black Box y tambe pa purba salba e Helicopter modelo NH-90. E tin un sistema di “floaters” cu ta sali den banda pa impedi cu e ta sink. Pero awe tardi, kisas pa e coriente pisa di lama of biento, a haci cu e “floater” nan a “give up” y a Helicopter a sink bay den fondo di lama, na 1 kilometer di profundidad.
Loke a pasa ta cu, unda e avion a cay, tabatin un profundidad di 2,5km y pocopoco a keda trece mas cerca di costa di nos isla. Na mes momento a solicita ayudo di un barco civil pa yuda nan saca e Helicopter for di bou awa y pa sak’e for di lama. Pero, prome cu e barco civil a logra yega na e sitio, e helicopter a sink completamente y alcansa te cu 1km bou awa. Awo e proceso nobo a cuminsa pa mira con ta sak’e for di eybou.
Mester menciona cu desde fin di aña 2007, Hulanda a cumpra su prome Helicopter modelo NH-90. Na februari 2013 a añadi no menos cu 8 unidad acerca. Di e tempo ey a nota cu e Helicopternan aki no por maneha salpeter y tabata frustia masha lihe. A nota cu e Helicopternan cu ta haci trabou riba lama, entre otro esunnan cu ta bin pa e islanan di Caribe Hulandes, ora di haci trabou di mantencion riba nan, ta topa cu problemanan serio di corosion. Asina mes e Presidente di ACOM, cu ta Bond van Defensiepersoneel, e Helicopternan aki no ta duna dolor di cabes, al contrario, ta considera nan “probleemloos toestel” y nunca ta envolvi den incidentenan grandi.
Locual si tin keho riba dje ta e zonido cu e motor di e Helicopter ta produci, pa cual pilootnan ta teme cu nan por bira sordo despues di tempo. E tempo ey Defensa a dicidi cu no por bula e aparato pa mas di 1 ora. Dor cu ki ora cu saca e Helicopter pa mantencion, nan ta keda asina tanto tempo for di circulacion, cu e pilootnan no ta haya chens pa por entrena. Asina e pilootnan no ta logra yena e oranan obligatorio di vuelo y di entrenamento.
No ta solamente Hulanda, pasobra otro paisnan tambe tin problema cu e helicopternan aki. Tin a saca nan for di circulacion pasobra nan mantencion ta caro. Hulanda por ehempel a paga como 50 miyon Euro pa cada un di e 20 Helicopternan aki cu nan a cumpra pa Defensa di Reino Hulandes. Anualmente e helicopternan NH-90 ta costa Gobierno di Hulanda entre 20 pa 25 miyon Euro na mantencion so.
