Cada bes cu Minister di Husticia Andin Bikker presenta den conferencia di prensa di Gobierno ta expresa e speransa cu pa “e siman aki of otro siman nos ta spera di yega na un areglo cu Venezuela pa deportacion di un grupo di persona. Pero te ainda nada.
E siman aki atrobe ta e caso. El a menciona cu tin un grupo grandi di personanan deteni en espera di nan deportacion, entre otro un grupo grandi di personanan cu a caba di sinta nan castigo.
Si antes personanan descubri trahando ilegal por ta sigur cu ta deporta nan hopi lihe, sinembargo desde cierre di frontera y despues di crisis di coronavirus, esaki a bira mas dificil. E preocupacion cu tin ta cu basta persona cu a caba di sinta nan castigo ta wardando pa saca nan. Na KIA nan tabata den un luga cu hopi siguridad pasobra ta personanan cu a comete crimennan violento. P’esey antes, nan ta sali directamente for di KIA pa aeropuerto. Ya caba tin 20 persona den centro di detencion, ya cu no tin vuelo pa pone nan riba un avion.
Siman pasa, segun e mandatario, den e Cumbre di Husticia a haci apelacion na Minister di Husticia di Hulanda pa haci esfuerso of intermedia cu Venezuela pa haya un reapertura pa repatria e personanan aki.
