Movecion kisas ta algo cu ta bon pa stroke. Ora cu menciona e cifranan di hende homber y hende muhe, por consider’e como cifranan halto. Segun Charlene Leslie di IBISA, esey ta nifica cu un persona di dos hende homber tin presion halto. Si mira tambe e ultimo cifranan cu Leslie tin di 2013, pa Januari te cu Juni, tres hende ta drenta den hospital pa siman, pa motibo di stroke. Esaki sigur ta un cantidad halto. E mortalidad causa pa malesanan di curason y ader ta 33%. Bo ta mira cu salud di nos curason, di nos ader ta bay atras, ta un causa hopi grandi pa mortalidad di Aruba. Un di e causanan mas grandi. Causanan cu nos por preveni si nos tin un estilo di bida saludabel. Tambe tin e parti genetico y un parti cu no tin hopi control riba dje, pero toch e estilo di bida ta keda importante, cu hende mester realisa cuanto efecto e falta di actividad fisico y nutricion saludabel riba calidad di bida den futuro.
E recomendacion ta pa haci minimo 30 minuut di actividad fisico pa dia. Pa esnan cu tin un peso mucho halto, sobrepeso of obesidad of personanan cu kier baha peso, ta recomenda 60 minuut pa dia. Esaki ta e minimo cu lo mester haci. E ora no ta solamente cana bay na bo auto, pero echt haci un actividad. Bo por wak’e tambe como ongeveer 150 minuut pa siman, si bo haci diferente tipo di training of haci deporte durante siman. Toch bo ta yega na bo total di e siman. Locual cu ta keda importante, pa tur dia nos move. Evita di keda sinta. Esaki tambe por percura pa blokeo den e adernan, segun Leslie.
