Diadomingo si ta bon, lo bay recorda internacionalmente e fecha aki, cual ta Dia Mundial di Stroke. Charlene Leslie kende ta e funcionario di promocion di salud na Ibisa, ta conta cu diadomingo awo ta World Stroke Day.
Kier a trece e mensahe con por preveni stroke y tambe ki complicacionnan por bin despues. Naturalmente biniendo for di Ibisa, ta enfoca hopi riba e parti di prevencion, con por preveni pa yega asina leu pa haya un stroke.
E parti di Lifestyle, e parti di come saludabel, actividad fisico, mantene un peso saludabel, evita abuso di alcohol y tambe humamento, e uzo di tabaco. Tur esakinan por ta un causa pa haya un stroke.
Mensahe
Charle Leslie ta un profesional den e area di entre otro nutricion. Den e caso aki di stroke, ta wak’e como un plachi completo. Un paar di dia pasa tabata tin e World Heart Day tambe cu tambe ta concientisa riba e parti di tene bo adernan y curason saludabel. E parti di Stroke ta bin bek riba esaki, cu e problema di stroke ta yega na bo adernan. E ora ey un stroke ta nifica cu e zuurstof den e sanger no ta yega na un parti di celebro. Esaki por ta door di un blokeo den e adernan of si sanger di e ader cuminsa lek den bo celebro. E ora ta papia di un stroke. Con ta yega na esey, por ta entre otro un colesterol halto of si bo tin presion halto, cu e presion riba e adernan ta asina halto cu nan por rementa y si esaki lo mester pasa na bo celebro e ora por papia di un stroke. Eynan ta echt enfoca riba e parti di nutricion. Tin cu percura pa tin un nutricion saludabel y wak bon pa e vetnan saludabel, pa percura cu e colesterol keda mas abao posibel. Tambe vooral e parti di presion. Basta hende na Aruba ta cana cu presion halto. Esaki ta un den tres hende muhe y den hende homber ta 1 den dos hende homber cu ta cana rond cu un presion halto.
Si e presion aki subi mucho hopi, e ora un ader chikito por ta un haarvaatje den bo celebro cu por rementa cu por tin un consecuencia hopi grandi cun’e, manera un stroke. Esaki por ta algo mortal of si hasta bo recupera di dje, e por tin su consecuencianan despues tambe.
