Despues di a keda 2 siman cera, e siman aki gymnan a haya e mal noticia cu nan ta obliga di keda cera pa 2 siman mas. “E ta comprendibel cu crisis team kier evita contagio di Covid-19, pero locual ta incomprendibel pa mi y mi ta sigur cu mi ta papia pa e otro doñonan di gym, e atletanan y e tantisimo hendenan cu ta haci uzo di gymnan pa mantene nan mes saludabel, ta cu crisis team y gobierno ta sigi pone obstaculo pa por haci uzo di gymnan”, asina Giovanni Arendsz a duna di conoce.
“Gymnan no ta caminda hende ta bay pa socialisa. Gymnan ta caminda hendenan ta bay pa haci esfuerso pa mantene nan salud fisico y salud mental den bon condicion, pa asina cuida nan mes den un temporada unda esaki ta algo critico y crucial”, segun e experto di gym a enfatisa.
E gymnan tin 2 siman cera caba pero esaki no tabatin ningun of poco efecto riba e cifranan di contagio di Covid, segun e doñonan di gym. E contagio diario ta keda halto. E problema no ta e gymnan, e problema ta otro caminda y gobierno no tin un manera ni un plan concreto pa trece esaki bou control.
Gymnan ta insisti di tin protocolnan estricto pa cumpli cu distanciamento social y proteccion pa clientenan pero toch a opta pa keda mantene esakinan cera. Den ningun gym ta permiti pa clientenan train den grupo, watercoolernan y cabinanan di baña ta cera. No ta permiti pa sinta na bar y tur hende ta haya nan boter di desinfectante pa haci limpi loke nan uza. Na cua otro establecimento cliente ta obliga di haci tur cos cu nan touch limpi?
Localidadnan caminda cosumo di alcohol ta halto, hendenan ta aglomera y ta intercambia cu otro socialmente ta permiti pa keda habri sin problema, creando posibilidadnan di mega contagio cu ta evita cu e cantidad di contagio diario ta baha mas lihe. “Den fin di siman tabatin e wega di futbol El Clasico entre Barcelona y Real Madrid y barnan tur caminda na Aruba tabata rand rand di hende ta mira futbol, bebe y socialisa. Cu esaki nos ta mira duidelijk cu gobierno no tin un grip riba e situacion”, segun Giovanni Arendsz.
Na final e comerciante a expresa cu “Un muestra di maneho cu no ta funcionando y no ta realisa cu actividad fisico ta esencial, specialmente na e momentonan aki. Desicionnan asina aki ta afecta henter un comunidad economicamente pero tambe tin su consecuencia pa salud fisico y salud mental di henter pueblo.”
