Tin varios persona cu a haya e virus di Corona. Luanne Villasmil-Eman tambe ta un di e personanan cu a contagia e virus. E ta conta cu ainda e tin e efectonan secundario. El a keda cu algun problema di curason.
Luanne tabata un hende saludabel y ta ainda e ta, den un decir. E ta purba di haci eherecicio y come bon. E ta conta cu tabata durante vakantie liber di COVID. E tabata tene su precaucionnan sanitario.
E lo mester a contagia door di un amigo cu e mes no tabata sa, of cualkier otro caminda. Di unda cu e por a hay’e, no ta sigur.
Luanne a cuminsa ta sinti tiki cansa riba un dialuna. El a bay traha toch mirando cu e ta un juffrouw di scol, sin sa cu e tabatin COVID. Su siguiente dia el a lanta un tiki mas cansa y a cuminsa sinti keintura. Su dokter di cas a bis’e despues cu a yam’e, a conseh’e pa e bay test.
Den careda di 10’or di anochi, el a haya noticia cu e ta positivo. Pa e ora ey caba e tabatin keintura. El a sinti manera un griep.
Mirando cu e ta mama di famia, el a isola su mes for di su famia. For di basta hende el a haya mensahe, consehando kico pa bebe pa e por lanta su defensa. Sinembargo nada no a yuda. E paracetamol cu e tabata bebe, dado momento no tabata yuda mas.
Luanne a keda cinco dia cu keintura. E curpa no tabata por mas. Dokter di cas a presenta na cas pa asina check e rosea, cual nunca a bira malo. Pero e keintura a haci cu a yega un momento cu e no por a ni cana.
Despues di cinco dia e stoma a daña. Nada no ta baha. Ta ijs so e por a chupa. Una bes cu el a dicidi pa bay Eerste Hulp (SEH), caminda cu el a keda y ricibi awa di bida pa despues bay cas.
Anochi el a bay flauw, pa despues bay hospital cu ambulance. Un biaha mas a tene den Eerste Hulp, caminda a haci tur e testnan necesario.
E odisea di Luanne tabata basta duro prome cu a yega asina leu di a cura di COVID. E ta conta tambe di su experiencia den hospital, cual el a indica cu e nursenan tabata hopi atento, aunke cu nan falta di mas personal. Tambe e dokter di sala y specialista di pulmon ta bin haci nan bishita.
Una bes na cas, e mester a isola su mes atrobe. Durante e periodo aki el a lesa hopi riba COVID online. Na cas ta su casa y su yiu so tabatin contacto cu ne. Luanne ta comenta cu el a keda suak y a keda cu problema di curason. E virus ta keda cambia y ta keda na bida. Si tin suerte, e ta ‘mutate’ pa e bay, pero ningun hende no sa esey.
