Diaranson merdia personal di Guardacosta a nota un señal straño riba radar. Mesora a mobilisa e metalshark pa bay controla e boto. A par’e parti pabou di nos isla, poco mas leu di Manchebo. Den e boto tabatin e capitan y su pasahero. E capitan ta local, cu ID di Aruba mientras e pasahero ta di Venezuela.
Ta trata aki di contrabanda di hende, a detene e capitan y hunto cu e departmento di Mensen Handel Mensen Smokkel lo procesa e detencion cerca fiscal. E pasahero lo pas’e over pa Guarda Nos Costa pa cuminsa cu e proceso di deportacion. E boto no tin nomber, e number marca riba dje ta: A-662 cu bandera di Aruba. Awo, fiscal lo dicidi si ta destrui e boto of si lo bend’e.
Guardacosta ya a informa cu lo intesiva nan control durante e periode di cuaresma aki. Tin tur indicacion cu e boto ta di Venezuela, a gaña pone un bandera di Aruba y pone un number pa haci como si fuera ta boto local.
