Riba Diahuebs Santo a yama un reunion cera (besloten bijeenkomst) unda cu Parlamento di Aruba a reuni cu Directie Wetgeving en Juridische Zaken (DWZ) pa haya informacion riba Rijkswet Caribisch Orgaan voor Hervorming en Ontwikkeling (COHO) y Rijkswet Aruba financieel toezicht (RaFT). E reunion aki no tabata uno publico. E representantenan di DWZ a duna presentacion na e parlamentarionan.
E reunion aki tabata di caracter informativo y e parlamentarionan a haya e oportunidad pa haci pregunta na personanan cu na e momento aki a hunga un rol den e proceso encamina pa negociacion di COHO y RaFT. mr. Gerlien Croes, parlamentario di AVP, a splica a sali fo’i e reunion aki y e pensamento, e standpunt di Fraccion AVP no ta cambia. E landspakket manera e ta, ta keda un preocupacion hopi grandi p’e fraccion. Nan a mira y a bin ta bisa na varios ocasion un cos ta firma algo y otro cos ta e realidad den practica con ta bay ehecuta loke a firma, loke a hinca pais Aruba aden.
Aruba tin falta grandi di financiamento, capacidad y tur otro recurso cu por listra den ehecucion di landspakket n’e forma cu a acorda. E realidad ta di e presentacionnan cu nan a haya den e ultimo simannan y tin di haber specificamente cu accionnan di landspakket.
mr. dr. Ryçond Santos do Nascimento, parlamentario di AVP, a indica loke no ta tarea di Reino ta keda como parti autonomo di e paisnan. Esey ta significa cu Gobierno di Aruba bou di control di un parlamento, “cu anos como pueblo di Aruba awo pero e tempo ey pueblo di Antias, pueblo di Surnam, cu nan ta aproba e parlamento ey”, Santos do Nascimento a bisa. Cu otro palabra tin un maneho di tur pais cu ta completamente democratico.
Durante e reunion por a mira un proposicion pa un ley di COHO, ley di Reino di COHO unda por mira poder ta bay direccion di Conseho di Minister di Reino ta bay direccion di Minister di Binnenlandse Zaken en Koninkrijksrelaties di Hulanda, ta bay pa COHO y CaFT. “Esaki ta tur poder cu ta cay bou di nos asuntonan interno”, e parlamentario a expresa.
Pa mas lesa proximo edicion di TREMPAN.COM.
