Prome Minister Evelyn Wever-Croes tabata presente na American University of Medicine Aruba, pa duna bonbini na e studiantenan nobo y desea nan exito cu inicio di nan carera.
Prome Minister Wever-Croes a inicia su discurso compartiendo cu e studiante-, maestronan y demas presente, pakico e ta un honor p’e por ta presente na e ocasion special p’e studiantenan y dicon e momento ta special p’e tambe. Despues cu Prome Minister Wever-Croes a finalisa scol secundario, su soño tabata pa bira un dokter. El a inicia cu e estudio pa esaki na Costa Rica, sinembargo pa motibo di ‘heimwee’ a bolbe bek Aruba, bandonando e soño aki. Considerando cu e tempo ey Ley, tabata e unico estudio cu por a sigui na Universidad di Aruba, a opta pa haci esey. Awendia ta contento cu e decision di a studia Ley y obtene su ‘black coat’, no obstante, esun di dokter esta ‘white coat’ semper lo keda special pe, Premier Wever-Croes a expresa.
Bisando esaki, Prome Minister a bisa e studiantenan tambe cu e periodo aki ta bin cu su retonan, pero alabes e lo ta un periodo den cual lo siña hopi. Y ta importante pa semper corda e rason pa cual a cuminsa cu e estudio, pasobra na final ora di obtene e diploma, tur cos lo ta bale la pena.
Ademas, Prome Minister Wever-Croes na e occasion a ricibi como regalo un cuadra como gratitud pa lidera pais Aruba cu caracter, inteligencia y consciencia. Prome Minister a termina deseando tur e studiantenan exito cu nan estudio, nan carera den medicina.
